جنگ بندی بھارتی خواہش پر ہوئی، کسی کو سیز فائر کروانے کا نہیں کہا، اسحٰق ڈار
نائب وزیر اعظم و وزیر خارجہ اسحٰق ڈار نے کہا ہے بھارتی جارحیت کا بھر پور انداز میں جواب دیا جسے نہ صرف بھارت بلکہ پور ا دنیا نے تصدیق کی، جبکہ جنگ بندی بھارتی خواہش پر ہوئی اور کسی کو سیز فائر کروانے کا نہیں کہا۔
لندن میں پریس کانفرنس کرتے ہوئے اسحٰق ڈار نے کہا کہ ہم جنگ نہیں چاہتے، کسی کو نہیں کہا کہ بھارت کے ساتھ جنگ بندی یا سیز فائر کروا دیں، ہم نے 10 مئی کی صبح 4 سے 8 بجے تک جوابی کارروائی کی، صبح 8 بج کر 15 منٹ پر امریکی سیکریٹری خارجہ مارکو روبیو نے کال کر کے بتایا کہ بھارت سیز فائر کا خواہشمند ہے۔
نائب وزیراعظم نے کہا کہ ’میں نے مارکو روبیو کو جواب میں کہا کہ پاکستان امن پسند ملک ہے، ہم تو جنگ چاہتے ہی نہیں ہیں، ہمارا مقصد ملک کو معاشی ترقی کی راہ پر کھڑا کرنا ہے‘۔
اسحٰق ڈار نے کہا کہ بھارت سندھ طاس معاہدے کو معطل نہیں کر سکتا، پانی کے ایک قطرے کو بھی روکنا یا اس کا رُخ موڑنا جنگی اقدام سمجھا جائے گا۔
انہوں نے کہا کہ ایسا ماحول بنایا گیا تھا کہ بھارت کو پاکستان کے خلاف برتری حاصل ہے، لیکن اس جنگ نے ثابت کیا کہ انہیں کوئی برتری حاصل نہیں ہے، بھارت کے جھوٹ کو دنیا بھر میں ایکسپوز کیا۔
ان کا کہنا تھا کہ وزیراعظم شہباز شریف نے پاک-بھارت جنگ کے دوران قیادت کی اور تینوں فورسز کے چیفس نے مل کر کام کیا جس سے پاکستان کو فتح نصیب ہوئی۔
وزیر خارجہ کا مزید کہنا تھا کہ بھارتی میڈیا بھی اس بات کو مان چکا ہے کہ اس بار اُن کا بیانیہ ناکام رہا، پاکستان کا بیانیہ حقائق پر مبنی تھا جسے دنیا بھر میں مانا گیا، جو کچھ ہم نے ہوا اور زمین پر کیا وہ دنیا نے دیکھا۔
برطانیہ کے مختصر دورے پر موجود نائب وزیراعظم اسحٰق ڈار نے ایک سوال کے جواب میں کہا کہ برطانیہ ہمارا تجارتی شراکت دار ہے، دورے کے دوران برطانوی حکام سے مختلف معاملات پر تفصیلی بات چیت کی، جس میں ایران اور افغانستان کے حوالے سے گفتگو اور موسمیاتی تبدیلیوں کی چیلنجز سے نمٹنے کے لیے ضروری تعاون پر تبادلہ خیال کیا گیا۔
خیبرپختونخوا میں سیلاب اور بارشوں سے ہونے والے نقصانات پر انہوں نے کہا کہ حکومت متاثرہ افراد کی ہر ممکن مدد کر رہی ہے، مزید کہا کہ ہم پاکستان کی ترقی چاہتے ہیں، معیشت کو بہتر بنا رہے ہیں، مہنگائی کم اور معاشی اعشاریے بہتر ہوئے، پاکستان دوبارہ عالمی افق پر اُبھرے گا۔
اسحٰق ڈار نے مزید کہا کہ پاکستان دہشت گردی کے سب سے زیادہ شکار ملک ہے، کوئی ہمیں یہ نہ بتائے کہ دہشت گردی پر آپ سے بات کرنی ہے، ہمارے 90 ہزار سے زائد افراد شہید، 152 ارب ڈالر سے زیادہ کا نقصان اُٹھایا، پاکستان نے دہشت گردی کے خلاف فرنٹ فٹ پر دنیا کی جنگ لڑی اور اس کے نقصان اٹھائے۔
لائیو ٹی وی