ڈراموں میں غیر حقیقی خواب دکھائے جارہے ہیں، ہر غریب لڑکی کو امیر لڑکا نہیں ملتا، فضیلہ قاضی
سینئر اداکارہ فضیلہ قاضی نے پاکستانی ڈراموں پر کڑی تنقید کرتے ہوئے کہا ہے کہ ڈراموں میں غیر حقیقی خواب دکھائے جا رہے ہیں، حقیقت میں ہر غریب لڑکی کو امیر لڑکا نہیں ملتا۔
فضیلہ قاضی نے حال ہی میں سما ٹی وی کے پروگرام ’گڈ مارننگ‘ میں شرکت کی، جہاں انہوں نے پاکستانی ڈراموں کے حوالے سے اپنی رائے کا اظہار کیا۔
ان کا کہنا تھا کہ ڈراموں کے ذریعے معاشرے کے معصوم لوگوں کے ذہنوں کو خراب کیا جا رہا ہے کیونکہ ہمارے معاشرے میں زیادہ تر لوگ درمیانے طبقے سے تعلق رکھتے ہیں۔
انہوں نے کہا کہ ڈراموں کے ذریعے اس طبقے کو نہ پورے ہونے والے خواب دکھائے جا رہے ہیں، عام طور پر نہیں ہونے والی چیزوں کو ڈراموں میں ایسے پیش کیا جا رہا ہے جیسے وہ حقیقت میں اسی طرح ہوتی ہیں۔
اداکارہ کے مطابق ڈراموں میں دکھایا جاتا ہے کہ ایک غریب گھر کی لڑکی آفس جاتی ہے جہاں اس کی ملاقات ایک امیر لڑکے سے ہوتی ہے، دونوں میں محبت ہو جاتی ہے اور پھر شادی ہو جاتی ہے، حالانکہ حقیقت میں ایسا نہیں ہوتا۔
فضیلہ قاضی نے کہا کہ عام طور پر انسان اپنے ہی طبقے، محلے اور خاندان میں شادی کرتا ہے، مثال دیتے ہوئے انہوں نے کہا کہ چونکہ وہ خود ایک اداکارہ تھیں اس لیے انہوں نے بھی ایک اداکار سے شادی کی۔
انہوں نے مزید کہا کہ ڈراموں میں غلط تصورات دکھائے جا رہے ہیں، لوگوں کو خواب بیچے جا رہے ہیں تاکہ ڈراموں کی ریٹنگز بہتر ہوں، اس وجہ سے ڈراما انڈسٹری اپنی ذمہ داریوں کو بھی نظر انداز کر رہی ہے اور وہ چیزیں عام کی جا رہی ہیں جو نہیں ہونی چاہئیں، جن کی وجہ سے معاشرے میں مسائل پیدا ہو رہے ہیں۔
ان کا یہ بھی کہنا تھا کہ ماضی میں بھارتی شوبز چینلز پر یہ ہوتا تھا کہ شام 7 بجے کے بعد لگاتار ڈرامے نشر ہوتے تھے اور اب یہی حال پاکستانی چینلز کا بھی ہے، بھارتی ڈراموں میں اداکارائیں مکمل میک اپ کے ساتھ سوتی دکھائی دیتی تھیں اور جاگنے کے بعد بھی ویسی ہی نظر آتی تھیں اور یہی رجحان اب پاکستانی ڈراموں میں بھی دیکھنے کو مل رہا ہے۔
لائیو ٹی وی