شہرکو آفت زدہ علاقہ ڈکلیئر کیا جائے، میئر کراچی بہانوں کے بجائے کام کریں، فاروق ستار
متحدہ قومی موومنٹ (ایم کیو ایم) پاکستان کے رہنما فاروق ستار نے کراچی کو آفت زدہ علاقہ ڈکلیئر کرنے کا مطالبہ کر دیا، انہوں نے کہا کہ طوفانی بارش کے دوران میئر کراچی اور سندھ حکومت فیلڈ سے غائب رہی۔
کراچی میں پریس کانفرنس کرتے ہوئے متحدہ قومی موومنٹ کے سینئر رہنما فاروق ستار نے کہا کہ میئر کراچی 40 ملی میٹر بارش کی گنجائش والے نالوں کے بہانے بنا رہے ہیں، اگر شہر سے بروقت کچرا اٹھا لیا جاتا تو 40 کیا 400 ملی میٹر بارش کا پانی بھی انہی نالوں سے 2 سے 3 گھنٹوں میں نکل جاتا۔
انہوں نے کہا کہ کراچی کے ساتھ سوتیلی ماں جیسا سلوک کیا جا رہا ہے، میئر کراچی کے دماغ میں کچرا ہے، جب کچرا نالوں میں پھنسے گا تو نالے کچھ نہیں کر سکیں گے، اپنی غلطیوں اور کوتاہیوں کو مانیں اور تسلیم کریں کہ شہر سے کچرا نہیں اٹھایا گیا اس لیے نکاسی آب نہیں ہو سکی۔
فاروق ستار نے کہا کہ گزشتہ روز کی بارش سے تاجروں کو ہونے والے نقصان کو کون پورے کرے گا، دکانوں میں پانی داخل ہوا، اس کا ازالہ کون کرے گا، کراچی کے لیے کوئی رین ریلیف فنڈ نہیں اور نہ ہی کسی پیکج کا اعلان کیا گیا۔
رہنما ایم کیو ایم کا کہنا تھا کہ مرتضیٰ وہاب لوگوں کی آنکھوں میں دھول جھونک رہے ہیں، اب تو سب کچھ آپ کا ہے، وسائل، زمینیں، ایس بی سی اے، سسٹم بھی تمھارا، وزیر اعلیٰ آپ کا ، کراچی پر قبضہ بھی آپ کا، کراچی تمھاری کالونی، اب کیا بہانہ ہے، 40 ملی میٹر کے چکر میں جان بچا کر نکل گئے۔
انہوں نے مزید کہا کہ شہر میں 175 سگنلز ہوتے تھے، آج 69 سگنلز ہیں، 106 کہاں گے، اس میں بھی آپ کے سپاہی سائیڈ پر کھڑے ہوں گے تو ٹریفک تو جام ہوگا، شہید ملت روڈ پر آج بھی پانی جمع ہے، میئر صاحب کہہ رہے ہیں کہ ہم نے اگلے اسپیل کی تیاری مکمل کر لی ہے، دعا کرو اگلا اسپیل نہ ہو اور بچت ہو جائے۔
متحدہ رہنما کا کہنا تھا کہ ہم میئر کراچی پر تنقید نہیں بلکہ جائزہ رپورٹ پیش کر رہے ہیں، بہانے نہ کریں، کچرا وقت پر اٹھایا جائے تو 40 ملی میٹر کی گنجائش والے نالے 400 ملی میٹر بارش کا پانی بھی نکال دیں گے۔
ڈاکٹر فاروق ستار نےکہا کہ کراچی کو بارش کا پانی نہیں بلکہ سوتیلی ماں جیسا، غیر انسانی اور امتیازی رویہ ڈبو رہا ہے، وزیراعلیٰ صاحب ایک سڑک سے ہو کر آگئے اور کہا کہ شہر سے پانی نکال دیا گیا، پاکستان کو بچانا ہے تو کراچی کو بچانا ہوگا، وزیراعظم شہباز شریف کو فون کر کے وزیراعلیٰ کی اپنی ذمہ داری سے پیچھے نہیں ہٹ سکتے۔
انہوں نے کہا کہ سندھ حکومت گزشتہ 17 برسوں کے دوران ملنے والے 22 ہزار ارب روپے کا حساب دے، میئر کراچی بھی ساڑھے 6 سال کا حساب عوام کو دیں، شہر کے مسائل کے حل کے لیے سیاسی جماعتوں کو بلائیں، بیٹھ کر بات کرتے ہیں، شہر کے مسائل کا حل نکالتے ہیں۔
متحدہ رہنما کا کہنا تھا کہ مرتضیٰ وہاب، بارش سے قبل رین ایمرجنسی سینٹر بناتے، متعلقہ افسران کے نمبرز شیئر کرتے، لیکن ایسا کچھ نہیں ہوا، کراچی کو آپ نے سندھ سے الگ کر دیا ہے، مرتضیٰ وہاب بول نہیں سکتے ، ہمیں اندازہ ہے کہ ان کی کیا مشکلات ہیں۔
دوران پریس کانفرس فاروق ستار نے جماعت اسلامی پر بھی تنقید کی اور کہا کہ جماعت اسلامی والے کہاں ہیں، انہوں نے شہریوں کے لیے کیا اقدامات اٹھائے، جاگتے ہوئے بھی ان کے اعصابوں پر ایم کیو ایم سوار ہے، سلیبس بدل گیا کوچ بدل گیا لیکن جماعت اسلامی اسی پرانے کورس پر چل رہی ہے۔
لائیو ٹی وی