اسلام آباد: چینی وزیر خارجہ وانگ ژی کی دفتر خارجہ آمد، نائب وزیراعظم نے استقبال کیا
پاکستان اور چین کے درمیان چھٹے اسٹریٹجک ڈائیلاگ میں شرکت کیلئے بدھ کو اسلام آباد پہنچنے والے چینی وزیر خارجہ وانگ ژی نے آج دفتر خارجہ کا دورہ کیا۔
دفتر خارجہ کی جانب سے ’ایکس‘ پر جاری بیان میں بتایا گیا ہے کہ نائب وزیر اعظم و وزیر خارجہ سینیٹر اسحٰق ڈار نے دفتر خارجہ آمد پر وانگ ژی کا استقبال کیا۔
بیان میں کہا گیا کہ ’وہ اہم ملاقاتیں کریں گے جن میں چین اور پاکستان کے درمیان چھٹے اسٹریٹجک ڈائیلاگ بھی شامل ہیں‘۔
یار ہے کہ چین کے وزیر خارجہ وانگ ژی گزشتہ روز پاکستان کے 3 روزہ دورے پر اسلام آباد پہنچے تھے، نائب وزیراعظم و وزیر خارجہ محمد اسحٰق ڈار نے نور خان ایئربیس پر ان کا استقبال کیا تھا۔
پاکستان کے روایتی لباس میں ملبوس بچوں کے گروپ نے چینی وزیر خارجہ کا خیر مقدم کیا اور پھول پیش کیے، اس موقع پر وزارت خارجہ اور پاکستان میں چینی سفارت خانے کے اعلیٰ حکام بھی موجود تھے۔
چینی وزیر خارجہ وانگ ژی نائب وزیراعظم و وزیر خارجہ اسحٰق ڈار کی دعوت پر پاکستان آئے ہیں۔
چینی وزیرخارجہ کے دورے کے دوران چھٹا پاک - چین وزرائے خارجہ اسٹریٹجک ڈائیلاگ اسلام آباد میں ہوگا جس میں وانگ ژی اپنے ملک کی نمائندگی کریں گے۔
پاک - چین اسٹریٹجک ڈائیلاگ کی مشترکہ صدارت وزیر خارجہ اسحٰق ڈار اور چینی ہم منصب مشترکہ طور پر کریں گے۔
لائیو ٹی وی