ریشم نے روبی انعم کے نامناسب رویے پر بشریٰ انصاری سے معذرت کرلی
ماضی کی مقبول فلمی ہیروئن ریشم نے اسٹیج اداکارہ روبی انعم کی جانب سے سینئر اداکارہ بشریٰ انصاری کے لیے استعمال کیے گئے توہین آمیز الفاظ پر معذرت کرلی۔
روبی انعم نے چند دن قبل ایک پوڈکاسٹ میں بشریٰ انصاری سے متعلق نامناسب بات کہی تھی، جس پر شوبز شخصیات نے بھی انہیں آڑے ہاتھوں لیا تھا۔
وڈکاسٹ میں میزبان کی جانب سے مہوش حیات، سجل علی، ہانیہ عامر، بشریٰ انصاری اور اسما عباس سمیت کئی خواتین فنکاروں کے بارے میں تبصرہ کرنے کی ضد پر روبی انعم نے بشریٰ انصاری سے متعلق قدرے نامناسب الفاظ استعمال کیے۔
انہون نے کہا تھا کہ بشریٰ انصاری ان کی پسندیدہ ہیں، وہ انہیں بہت پسند کرتی ہیں لیکن اگر وہ یہ کہیں تو یہ جھوٹ نہیں ہوگا کہ اس عمر میں انہیں آرام کرنا چاہیے۔
انہوں نے مزید کہا تھا کہ بشریٰ کے ولاگز ان پر سوٹ نہیں کرتے اور انہیں اللہ سے ڈرنا چاہیے کہ وہ اس عمر میں کام کر رہی ہیں، کیونکہ وہ ہماری ماؤں سے بھی بڑی ہیں۔
ایسے بیان پر روبی انعم کو دوسری شوبز شخصیات نے بھی آڑے ہاتھوں لیا تھا اور اب ریشم نے بھی انہیں آڑے ہاتھوں لیتے ہوئے ان کی زبان کو نامناسب قرار دے دیا۔
ریشم نے انسٹاگرام پر جاری کردہ ویڈیو میں روبی انعم کا نام لیے بغیر انہیں لاہور کی اسٹیج اداکارہ قرار دیا اور کہا کہ ہمیشہ لاہور کے اداکار کراچی کے اداکاروں کے حوالے سے نامناسب باتیں کرتے ہیں۔
انہوں نے کہا کہ ماضی میں فردوس جمال نے ہمایوں سعید سے متعلق نامناسب باتیں کیں اور اب اسٹیج اداکارہ نے بشریٰ انصاری کے حوالے سے نامناسب گفتگو کی۔
اداکارہ کا کہنا تھا کہ روبی انعم کا رویہ انتہائی نامناسب تھا، انہوں نے ایسی شخصیت کے خلاف بات کی، جنہوں نے ہمیشہ پاکستان کا نام روشن کیا۔
ریشم کے مطابق بشریٰ انصاری کئی سال سے وطن اور شوبز کی خدمت کرتی آ رہی ہیں، ان کا بڑا نام ہے، ان کے کام سے ملک کی عزت ہوتی ہے لیکن اسٹیج اداکارہ نے اپنی ویڈیو وائرل کرنے کے چکر میں ان کے لیے نامناسب زبان استعمال کی۔
انہوں نے روبی انعم کو مخاطب ہوتے ہوئے کہا کہ وہ بشریٰ انصاری جیسی شخصیت پر بات کرنے سے قبل پہلے بشریٰ انصاری بن کر دکھائیں۔
ریشم نے بشریٰ انصاری کو مخاطب ہوتے ہوئے ان سے روبی انعم کے رویے پر معافی مانگی اور کہا کہ وہ لاہور کی اداکارہ کے رویے پر معذرت خواہ ہیں۔
لائیو ٹی وی