نائب وزیراعظم اور وزیر خارجہ اسحٰق ڈار نے بنگلہ دیش کے دورے کے دوران چیف ایڈوائزر پروفیسر محمد یونس اور مشیر خارجہ ایچ ای ایم ڈی توحید حسین سے تفصیلی ملاقات کی ہے، دونوں ملکوں کے درمیان 6 معاہدوں اور مفاہمتی یادداشتوں پر دستخط کردیے گئے۔

دفتر خارجہ کی جانب سے سماجی رابطے کے پلیٹ فارم ایکس پر جاری کردہ پوسٹ کے مطابق نائب و وزیرخارجہ محمد اسحٰق ڈار نے آج ڈھاکا میں عوامی جمہوریہ بنگلہ دیش کے چیف ایڈوائزر، پروفیسر محمد یونس سے ملاقات کی۔

دوران ملاقات دونوں ممالک کے پرانے تعلقات کی تجدید، نوجوانوں کے مابین روابط کے فروغ، بہتر روابط قائم کرنے اور تجارتی و اقتصادی تعاون میں اضافے پر بات چیت ہوئی اور خطے کی حالیہ پیش رفت اور علاقائی تعاون کے امکانات بھی زیرِ بحث آئے۔

نائب وزیرِاعظم و وزیرِ خارجہ نے چیف ایڈوائزر کو وزیرِاعظم پاکستان کی نیک خواہشات پہنچائیں۔ انہوں نے چیف ایڈوائزر کو ڈھاکا میں اپنی مصروفیات اور دورے کے اہم نتائج سے آگاہ کیا۔ اس کے ساتھ ساتھ انہوں نے دورے کے دوران بہترین انتظامات اور ان کے وفد کو دی گئی پُرتپاک مہمان نوازی پر چیف ایڈوائزر کا شکریہ بھی ادا کیا۔

قبل ازیں، دفتر خارجہ کے مطابق وزیرخارجہ اسحٰق ڈار نے بنگلہ دیش کے مشیر خارجہ ایچ ای ایم ڈی توحید حسین سے تفصیلی ملاقات کی ہے، دونوں ملکوں کے درمیان 6 معاہدوں اور مفاہمتی یادداشتوں پر دستخط کردیے گئے۔

دونوں رہنماؤں نے دوطرفہ تعلقات کے تمام پہلوؤں کا جائزہ لیا جن میں اعلیٰ سطح کے دورے، تجارتی و اقتصادی تعاون، عوامی روابط، ثقافتی تبادلے، تعلیم اور استعداد کار میں اضافے کے منصوبے اور انسانی ہمدردی سے متعلق امور شامل تھے۔

اس موقع پر علاقائی اور عالمی امور پر بھی گفتگو ہوئی جن میں سارک کی بحالی، فلسطین کے مسئلے اور روہنگیا بحران کے حل جیسے موضوعات زیر بحث آئے۔

بات چیت تعمیری ماحول میں ہوئی جو دونوں ممالک کے درمیان موجود خیرسگالی اور دوستانہ تعلقات کی عکاسی کرتی ہے، فریقین نے دوطرفہ تعلقات کو مزید مضبوط بنانے پر اتفاق کیا، بنگلہ دیش کے مشیر خارجہ نے ڈپٹی وزیر اعظم اور وزیر خارجہ کے اعزاز میں ظہرانہ بھی دیا۔

قبل ازیں، نائب وزیر اعظم اور وزیر خارجہ سینیٹر محمد اسحٰق ڈار نے بنگلہ دیش کے مشیر تجارت شیخ بشیر الدین سے ناشتہ پر ملاقات کی تھی، وفاقی وزیر تجارت جام کمال خان بھی اس ملاقات میں شریک ہوئے۔

دونوں جانب سے اقتصادی و تجارتی تعاون کو فروغ دینے کے طریقوں پر گفتگو ہوئی، تجارت میں اضافے اور رابطہ کاری کے فروغ پر خصوصی زور دیا گیا۔

اس سے قبل نائب وزیراعظم اور وزیر خارجہ اسحٰق ڈار نے ڈھاکا میں پاکستان کے ہائی کمشنر عمران حیدر کی جانب اپنے اعزاز میں دیے گئے استقبالیہ میں شرکت کی۔

اس موقع پر نائب وزیر اعظم و وزیر خارجہ نے مختلف شعبہ ہائے زندگی سے تعلق رکھنے والی شخصیات سے ملاقات کی جن میں بنگلہ دیشی حکومت کے مشیران ، بیوروکریٹس، سیاسی جماعتوں کی قیادت، وائس چانسلرز، دانشور اور تھنک ٹینکس کے ارکان، کھلاڑی، فنکار، صحافی، ریٹائرڈ جرنیل اور دیگر شامل تھے۔

نائب وزیر اعظم و وزیر خارجہ اسحٰق ڈار نے اپنے خطاب میں اس بات پر زور دیا کہ پاکستانی عوام کو بنگلہ دیشی عوام کے ساتھ برادرانہ جذبات ہیں۔

انہوں نے کہا کہ دونوں ممالک کے تعلقات صدیوں پر محیط مشترکہ روایات، اسلامی ورثے، سماجی اقدار اور ادبی اظہار پر استوار ہیں، انہوں نے بنگلہ دیش کے عوام کے لیے ہم آہنگی اور خوشحالی کی نیک خواہشات کا اظہار کرتے ہوئے اس عزم کا اعادہ کیا کہ پاکستان بنگلہ دیش کے ساتھ ایک تعمیری اور مستقبل کی طرف دیکھنے والے تعلقات قائم کرنے کا خواہاں ہے۔

ترجمان دفتر خارجہ کے مطابق پاکستان اور بنگلہ دیش کے درمیان 6 معاہدوں اور مفاہمتی یادداشتوں پر دستخط ہوگئے جن میں سفارتکاروں، حکومتی اہلکاروں کے لیے ویزا ختم کرنے کا معاہدہ بھی شامل ہے۔

ترجمان دفترخارجہ کے مطابق پاک بنگلہ دیش فارن سروس اکیڈمیز کے درمیان مفاہفتی یادداشت پر دستخط ہوگئے، جبکہ ایسوسی ایٹڈ پریس آف پاکستان (اے پی پی) اور بنگلہ دیش سنگباد سنگستھا کےدرمیان مفاہمتی یادداشت پر دستخط ہوئے۔

ترجمان دفترخارجہ کے مطابق انسٹیٹیوٹ آف اسٹریٹیجک اسٹڈیز اسلام آباد اور بنگلہ دیش انسٹیٹیوٹ آف انٹرنیشنل اینڈ اسٹریٹیجک اسٹڈیز کے درمیان مفاہمتی یادداشت پر بھی دستخط ہوگئے۔

پاکستان اور بنگلہ دیش کے درمیان نالج کوریڈور منصوبے کے آغاز

پاکستان اور بنگہ دیش نالج کوریڈور منصوبے کے آغاز کا اعلان کردیا گیا،منصوبے کے تحت پانچ سو بنگلہ دیشی طلبہ کو تعلیمی وظائف دئیے جائیں گے ، سو بنگلہ دیشی سول سرونٹس کے لیے خصوصی تربیتی پروگرام کا بھی اعلان ہوگیا۔

ترجمان دفتر خارجہ شفقت علی خان کے مطابق منصوبے کے تحت آئندہ 5 سال کے دوران 500 بنگلہ دیشی طلبہ کو پاکستان میں اعلیٰ تعلیم کے لیے وظائف دیے جائیں گے، وظائف کا ایک چوتھائی حصہ میڈیسن کے شعبے کے لیے مختص کیا گیا ہے۔

ترجمان دفتر خارجہ کے مطابق اس منصوبے کے تحت 100 بنگلہ دیشی سول سرونٹس کے لیے خصوصی تربیتی پروگرام کا بھی آغاز ہوگا، جبکہ پاکستان ٹیکنکل اسسٹننس پروگرام کے تحت بنگلہ دیشی طلبہ کے لیے وظائف 5 سے بڑھا کر 25 کر دیے گئے۔

واضح رہے کہ نائب وزیر اعظم اور وزیر خارجہ اسحٰق ڈار نے گزشتہ روز نور خان ایئربیس سے ڈھاکا روانہ ہوئے تھے۔

دفتر خارجہ کے مطابق یہ دورہ پاکستان اور بنگلہ دیش کے تعلقات میں ایک اہم سنگِ میل ہے، کیونکہ کسی پاکستانی وزیرِ خارجہ نے تقریباً 13 برس بعد بنگلہ دیش کا دورہ کیا ہے۔

آخری بار پاکستان کی وزیر خارجہ حنا ربانی کھر نے نومبر 2012 میں 6 گھنٹے کا مختصر دورہ کیا تھا، تاکہ اس وقت کی وزیرِاعظم شیخ حسینہ کو اسلام آباد میں ہونے والے ایک سربراہی اجلاس میں شرکت کی باضابطہ دعوت دی جا سکے۔