وزیرخارجہ اسحٰق ڈار کی سعودی ہم منصب سے ملاقات، غزہ کی صورتحال پر تبادلہ خیال
نائب وزیر اعظم و وزیرخارجہ اسحٰق ڈار نے جدہ میں سعودی وزیر خارجہ فیصل بن فرحان سے ملاقات کی، دونوں رہنماؤں نے غزہ کی تشویشناک صورتحال پر بات چیت کی۔
وزیرخارجہ اسحٰق ڈار نے اپنے ایکس اکاؤنٹ پر سعودی ہم منصب سے ملاقات کی تصویر پوسٹ کی اور لکھا کہ اپنے بھائی سعودی عرب کے وزیر خارجہ فیصل بن فرحان سے مل کر بے حد خوشی ہوئی۔
وزیرخارجہ اسحٰق ڈار نے کہا کہ یہ ملاقات او آئی سی وزرائے خارجہ اجلاس کی سائیڈ لائنز میں ہوئی، ہم نے ملاقات میں غزہ کی تشویشناک صورتحال پر بات چیت کی۔
انہوں نے کہا کہ ملاقات میں غزہ میں امن کے لیے مستقل جنگ بندی اور انسانی امداد کی فوری رسائی پر اتفاق کیا گیا اور دونوں جانب سے پاک سعودیہ دو طرفہ تعلقات کا بھی جائزہ لیا گیا۔
نائب وزیراعظم و وزیرخارجہ نے کہا کہ فیصل بن فرحان کے ساتھ باہمی دلچسپی کے امور اور علاقائی و عالمی معاملات بھی زیر غور آئے۔
خیال رہے کہ نائب وزیراعظم و وزیرخارجہ دو روزہ دورے پر سعودی کے دورے پر ہیں جہاں انہوں نے اسلامی تعاون تنظیم کی وزرائے خارجہ کونسل کے ہنگامی اجلاس سے آج خطاب بھی کیا۔
اپنے خطاب میں انہوں نے کہا کہ کہ گریٹر اسرائیل منصوبہ ناقابل قبول اور امن کیلئے خطرہ ہے، پاکستان گریٹر اسرائیل منصوبے کو سختی سے مسترد کرتا ہے۔
فلسطین میں شدید قحط کی صورتحال ہے اور اس صورتحال میں فوری اقدامات ناگزیر ہیں، عالمی برادری فوری، مستقل اور غیرمشروط جنگ بندی کیلئے اقدامات کرے۔
وزیرخارجہ نے کہا کہ غزہ میں انسانی امداد کی مکمل اور محفوظ رسائی یقینی بنائی جائے اور جبری بے دخلی اور غیرقانونی قبضے کا جلد خاتمہ یقینی بنایا جائے۔
لائیو ٹی وی