لاہور: 30 روپے کے تنازع پر وحشیانہ قتل کا مرکزی ملزم گرفتار
لاہور کے علاقے رائیونڈ میں 30 روپے کے تنازع پر وحشیانہ قتل کے مرکزی ملزم کو گرفتار کر لیا گیا۔
ڈان نیوز کے مطابق ڈی آئی جی آپریشنز نے ملزمان کی گرفتاری کیلئے اسپیشل ٹیم تشکیل دی تھی، ڈی آئی جی آپریشنز نے ایس پی صدر کو تمام کارروائی کی خود نگرانی کا حکم دیا تھا۔
اسپیشل ٹیم نے ایس ایچ او رائیونڈ محمد ذکاء کی سربراہی میں ملزم شہزاد کو گرفتار کیا، پولیس ٹیم نے جدید ٹیکنالوجی سمیت دستیاب وسائل بروئے کار لاکر ملزمان کو گرفتار کیا۔
ڈی آئی جی آپریشنز کا کہنا تھا کہ دوہرے قتل کا واقعہ 21 اگست کو رائیونڈ میں پیش آیا تھا، پھل فروش ملزمان نے معمولی تنازع پر دو بھائیوں کو تشدد کرکے قتل کر دیا تھا، وقوعہ کے بعد مرکزی ملزم روپوش ہو گیا تھا۔
ڈی آئی جی نے بتایا کہ ملزمان کے خلاف قانون کے مطابق سخت کارروائی عمل میں لائی جا رہی ہے۔
واضح رہے کہ لاہور میں پھل خریدنے کے دوران صرف 30 روپے کے تنازع پر تشدد سے ایک بھائی جاں بحق اور دوسرا شدید زخمی ہوکر کومے میں چلا گیا تھا، پولیس نے واقعے کا مقدمہ درج کرلیا تھا۔
اگلے روز رائے ونڈ میں معمولی جھگڑے پر پھل فروشوں کے بہیمانہ تشدد کا نشانہ بننے والا دوسرا بھائی بھی زخموں کی تاب نہ لاتے ہوئے دم توڑ گیا تھا۔
ایک سڑک پر پھل فروشوں نے دونوں بھائیوں کو مبینہ طور پر 30 روپے کے جھگڑے پر شدید تشدد کا نشانہ بنایا تھا۔
سوشل میڈیا پر وائرل ویڈیو میں دیکھا جا سکتا ہے کہ واجد اور رشید خون میں لت پت پڑے ہیں جبکہ ملزمان ڈنڈوں سے سرِعام ان پر حملہ کر رہے ہیں، اور اردگرد موجود لوگ تماشائی بنے کھڑے ہیں۔
لائیو ٹی وی