کسی دوسرے ملک میں ہوتیں تو جرمانہ ادا کرنا پڑتا، ہانیہ عامر کی بائیک ویڈیو پر نادیہ حسین کا ردعمل
ماضی کی معروف ماڈل، ٹی وی میزبان و اداکارہ نادیہ حسین کا کہنا ہے کہ ہانیہ عامر کی بائیک ویڈیو نوجوانوں کے لیے غلط پیغام تھا اور بیرونِ ملک ایسا کرنے پر انہیں جرمانہ دینا پڑتا۔
نادیہ حسین نے حال ہی میں ’ایف ایچ ایم پوڈکاسٹ‘ میں شرکت کی، جہاں انہوں نے مختلف موضوعات پر کھل کر گفتگو کی۔
بارش کے حوالے سے بات کرتے ہوئے نادیہ حسین نے کہا کہ جب بارش شروع ہوتی ہے تو خوشی محسوس ہوتی ہے، لیکن جب اسی بارش کی وجہ سے شہر اور ملک میں تباہی دیکھنے کو ملتی ہے تو خوشی افسوس میں بدل جاتی ہے۔
گلوکار حسن رحیم کی شادی پر ہونے والی تنقید پر نادیہ حسین نے کہا کہ حسن اور ان کی اہلیہ خوش ہیں تو دوسروں کو ان کی خوشیوں میں مداخلت یا انہیں خراب کرنے کا کوئی حق نہیں۔
انہوں نے سراہا کہ حسن رحیم نے ایک نامور شخصیت ہونے کے باوجود فربہ جسم والی لڑکی سے شادی کرکے یہ ثابت کیا کہ محبت میں ظاہری شخصیت کی کوئی اہمیت نہیں ہوتی۔
ان کے مطابق کچھ تصاویر کے زاویے کی وجہ سے حسن کی اہلیہ فربہ دکھائی دیتی ہیں، ورنہ وہ بہت پیاری ہیں۔
کزنز کے درمیان شادی کے معاملے پر نادیہ حسین کا کہنا تھا کہ اس میں کوئی برائی نہیں، لیکن نسل در نسل ایسا کرنا جینیاتی مسائل پیدا کرسکتا ہے، جس کا اثر اولاد پر پڑتا ہے۔
اداکارہ ہانیہ عامر کی بائیک ویڈیو پر ردعمل دیتے ہوئے نادیہ حسین نے کہا کہ ایک مشہور شخصیت ہونے کے ناطے ہانیہ عامر کو ایسا نہیں کرنا چاہیے تھا، اگر وہ کسی دوسرے ملک میں ایسا کرتیں تو انہیں جرمانہ ادا کرنا پڑتا، لیکن پاکستان میں ایسا کوئی قانون لاگو نہیں ہوا۔
ان کا کہنا تھا کہ اس قسم کی ویڈیوز نوجوانوں کے لیے غلط پیغام کا ذریعہ بنتی ہیں اور ہمارے ملک میں جہاں پہلے ہی قانون کی پابندی نہ ہونے کے برابر ہے، وہاں یہ رویہ مزید بگاڑ پیدا کرسکتا ہے۔
گزشتہ دنوں ہانیہ عامر نے انسٹاگرام پر ایک ویڈیو شیئر کی تھی، جس میں انہیں کھڑے ہو کر موٹرسائیکل سواری سے لطف اندوز ہوتے اور بیک گراؤنڈ میوزک پر خوشی سے رقص کرتے ہوئے دیکھا گیا تھا۔
لائیو ٹی وی