ایف بی آر کے سخت اقدامات، کوریئرز اور ڈیجیٹل پلیٹ فارمز کے لیے ریٹرن جمع کرانا لازمی قرار
ای کامرس پر نگرانی مؤثر بنانے کے لیے ایف بی آر نے کوریئرز اور ڈیجیٹل پلیٹ فارمز کو ریٹرن لازمی جمع کرانے کا پابند بنا دیا۔
ڈان اخبار کی رپورٹ کے مطابق فیڈرل بورڈ آف ریونیو (ایف بی آر) نے تعمیل کے پروٹوکول مزید سخت کرتے ہوئے کوریئرز اور ادائیگی کے درمیانی اداروں پر سہ ماہی ریٹرن جمع کرانے کی پابندی عائد کر دی ہے، جو ودہولڈنگ ٹیکس جمع یا کٹوتی کرنے کے ذمہ دار ہیں۔
ریونیو اتھارٹی نے انکم ٹیکس رولز 2002 میں ایس آر او 1634 آف 2025 کے ذریعے ڈرافٹ ترامیم جاری کی ہیں، یہ ڈرافٹ اسٹیک ہولڈرز کی رائے حاصل کرنے کے بعد حتمی شکل دی جائے گی۔
مجوزہ پروٹوکول صرف ملکی ای کامرس اداروں اور کوریئرز پر لاگو ہوں گے۔
مجوزہ ترامیم کے تحت، سیکشن 165 کی ذیلی شق 2 اور سیکشن 165 سی کی ذیلی شق 1 کے مطابق، کوئی بھی کوریئر یا ادائیگی کا درمیانی ادارہ جو آرڈیننس کے چیپٹر 10 کے پارٹ 5 کے ڈویژن 2 یا ڈویژن 3 یا چیپٹر 12 کے تحت ٹیکس جمع یا کٹوتی کرنے کا پابند ہے، اسے سہ ماہی اسٹیٹمنٹ جمع کرانی ہوگی۔
یہ اسٹیٹمنٹس برقی طور پر ان فارمیٹس میں جمع کرائی جائیں گی جو رولز کے سیکنڈ شیڈول کے پارٹ 10 میں تجویز کیے گئے ہیں۔
ریٹرن جمع کرانے کی آخری تاریخیں مقرر کی گئی ہیں، 20 اپریل (اختتام مارچ 31)، 20 جولائی (اختتام جون 30)، 20 اکتوبر (اختتام ستمبر 30) اور 20 جنوری (اختتام دسمبر 31)۔
ڈیجیٹل کامرس کی نگرانی کو مزید مؤثر بنانے کے لیے ایک متوازی اقدام کے تحت ایف بی آر نے آن لائن مارکیٹ پلیسز پر ماہانہ رپورٹنگ کی پابندی بھی عائد کی ہے، جو ڈیجیٹل طور پر آرڈر کیے گئے سامان اور خدمات کو ہینڈل کرتی ہیں۔
سیکشن 165سی کی ذیلی شق 2 کے مطابق، ڈیجیٹل پلیٹ فارمز کو ماہانہ تفصیلی اسٹیٹمنٹس جمع کرانا ہوں گی جن میں رجسٹرڈ سیلرز کے لین دین اور مجموعی اعداد و شمار شامل ہوں گے۔
مزید یہ کہ اگر کوئی آن لائن مارکیٹ پلیس کوریئر سروس فراہم کرتی ہے تو اسے رول 44 کے ذیلی قاعدہ 2 کے تحت بھی اسٹیٹمنٹس جمع کرانی ہوں گی، جو سیکنڈ شیڈول کے پارٹ 10 کے ساتھ منسلک ہیں۔
ایف بی آر نے واضح کیا ہے کہ یہ اسٹیٹمنٹس دو مخصوص فارمیٹس میں جمع کرائی جائیں گی: فارم اے1 اور فارم اے2۔
لائیو ٹی وی