وزیر اعظم شہباز شریف وفاقی وزرا کے ہمراہ چین پہنچ گئے
وزیراعظم شہباز شریف 25ویں شنگھائی تعاون تنظیم (ایس سی او) سربراہی اجلاس میں شرکت کے لیے 6 روزہ دورے پر چین پہنچ گئے۔
ڈان نیوز کے مطابق وزیراعظم شہباز شریف کے ساتھ نائب وزیراعظم اسحٰق ڈار، وزیر اطلاعات عطااللہ تارڑ اور مشیر طارق فاطمی کا چین پہنچنے پر شاندار استقبال کیا گیا۔
وزیراعظم دورہِ چین کے دوران شنگھائی تعاون تنظیم کے سربراہی اجلاس سے خطاب کریں گے۔
سماجی رابطے کے پلیٹ فارم ’ایکس‘ پر وزیراعظم شہباز شریف نے لکھا کہ ’چین کے تاریخی دورے کے دوران شنگھائی تعاون تنظیم کے سربراہان مملکت کے اجلاس میں شرکت کروں گا۔‘
وزیرِاعظم شہباز شریف شنگھائی تعاون تنظیم (ایس سی او) کی کونسل آف ہیڈز آف اسٹیٹ (سی ایچ ایس) اور ایس سی او ایس ایچ ایس پلس اجلاس میں شرکت کریں گے۔
شنگھائی تعاون تنظیم کونسل آف ہیڈز آف اسٹیٹ اجلاس میں تنظیم کے رکن ممالک کے سربراہانِ مملکت و حکومت شریک ہوں گے، جن میں پاکستان، بیلاروس، چین، بھارت، ایران، قازقستان، کرغزستان، روس، تاجکستان اور ازبکستان شامل ہیں۔
ایس سی او ایس ایچ ایس اجلاس میں وزیرِاعظم شہباز شریف علاقائی اور عالمی مسائل پر پاکستان کا مؤقف پیش کریں گے جبکہ سی ایچ ایس پلس اجلاس کے دوران وزیرِاعظم، پاکستان کی کثیرالجہتی تعاون کے فروغ، علاقائی سلامتی میں اضافے اور پائیدار ترقی کو آگے بڑھانے کے عزم کی تجدید کریں گے۔
وزیر اعظم بیجنگ میں دوسری جنگ عظیم کی فتح کی 80ویں سالگرہ کی تقریب میں شرکت کریں گے، صدر شی جن پنگ سمیت دیگر عالمی رہنماؤں سے ملاقات بھی کریں گے، چین کے ساتھ موسمی اسٹریٹجک تعاون پر مبنی شراکت داری مزید مضبوط بنائیں گے۔
اپنی پوسٹ میں وزیر اعظم نے کہا کہ خطے کے دیگر اہم ممالک سے تعلقات کے فروغ پر بات چیت ہوگی، شہباز شریف نے علاقائی اور کثیرالجہتی تعاون کو مستحکم کرنے پر زور دیا اور کہا کہ امن و خوشحالی کے مشترکہ اہداف کو آگے بڑھائیں گے۔
یاد رہے کہ دفتر خارجہ نے گزشتہ روز بتایا تھا کہ وزیرِ اعظم شہباز شریف 30 اگست سے 4 ستمبر تک چین کا دورہ کریں گے، جہاں وہ تیانجن میں شنگھائی تعاون تنظیم (ایس سی او) کے اجلاس میں شریک ہوں گے۔
وزیراعظم شہباز شریف کی چین کے صدر شی جن پنگ اور وزیرِاعظم لی چیانگ سے ملاقاتیں شیڈول ہیں، اس دوران پاک-چین تعلقات کے کثیر الجہتی پہلوؤں پر تبادلہ خیال کیا جائے گا۔
وزارت خارجہ کے مطابق وزیراعظم شہباز شریف دوسری جنگِ عظیم میں فاشزم کی شکست کی 80 ویں سالگرہ پر بیجنگ میں ہونے والی فوجی پریڈ میں شریک ہوں گے۔
شہباز شریف کی چینی تاجروں اور کارپوریٹ ایگزیکٹوز سے ملاقاتیں بھی شیڈول ہیں، جس میں دونوں ممالک کے درمیان تجارتی، معاشی اور سرمایہ کاری کے تعاون پر بات چیت کی جائے گی۔
وزیراعظم بیجنگ میں پاک-چین ’بی ٹو بی‘ انویسٹمنٹ کانفرنس سے بھی خطاب کریں گے۔
ترجمان دفتر خارجہ نے بتایا کہ وزیراعظم شہباز شریف کا دورہ پاک-چین اعلیٰ سطح کے روابط کا تسلسل ہے، دورے میں سی پیک فیز-ٹو کی پیشرفت پر بھی بات ہوگی۔
لائیو ٹی وی