میرا شہر پی ٹی آئی، ٹھیکیدار اور بیورو کریٹس نے ملکر تباہ کیا، پیچھا نہیں چھوڑوں گا، خواجہ آصف
وزیر دفاع خواجہ آصف نے کہا ہے کہ میرا شہر (سیالکوٹ) پاکستان تحریک انصاف (پی ٹی آئی) کی مقامی قیادت، ٹھیکیدار زیڈ کے بی اور چند بیورو کریٹس نے مل کر تباہ کر دیا، میں قبر تک ان کا پیچھا نہیں چھوڑوں گا۔
سماجی رابطے کی ویب سائٹ ’ایکس‘ پر ایک ویڈیو شیئر کرتے ہوئے اپنی پوسٹ میں خواجہ آصف نے لکھا کہ اس وڈیو کے ساتھ آواز پی ٹی آئی کے لیڈر عمر فاروق مائر کی ہے، اور یہ نشاندہی انہوں نے میرے خیال میں عبوری حکومت کے وقت کی تھی۔
وفاقی وزیر نے مزید کہا کہ جب کہ یہ وڈیو آج کی ہے، میری آج اس پروجیکٹ کے ڈائریکٹر سے بات ہوئی ہے، وہ میرے مؤقف اور پریشانی سے اتفاق کرتے ہیں۔
خواجہ آصف نے کہا کہ زیڈ کے بی جو اس منصوبے کے ٹھیکیدار ہیں، وہ مشہور ٹھیکدار اور پارلیمنٹ کے ایوان بالا کی با اثر شخصیت ہیں۔
وزیر دفاع نے بتایا کہ میرا ان سے تعارف 2013 میں ہوا تھا، جب میں وزیر پانی و بجلی تھا، زیڈ کے بی بلوچستان میں ایک ٹھیکہ لینے کے امیدوار تھے، وہ ایک علیحدہ کہانی ہے، جس میں سفارشی میرے چند ساتھی تھے۔
انہوں نے کہا کہ میر ا شہر پی ٹی آئی کی مقامی قیادت، ٹھیکیدار زیڈ کے بی اور چند بیوروکریٹس نے مل کر تباہ کر دیا ہے، میں قبر تک ان کا پیچھا نہیں چھوڑوں گا۔
وفاقی وزیر نے ایک اور تحریر نقل کرتے ہوئے لکھا کہ یہ سیلاب بھی یہودی ایجنٹ لگتا ہے انگریز کے بنائے 200 سال پرانے پل نہیں ٹورتا، اور ہمارے محب وطن ٹھیکیداروں کے پل بہا کر لے جاتا ہے۔
لائیو ٹی وی