8 امریکی بحری جنگی جہاز 1200 میزائلوں سے وینز ویلا کو نشانہ بنا رہے ہیں، صدر مادورو
وینزویلا کے صدر نکولس مادورو نے دعویٰ کیا ہے کہ 8 امریکی بحری جنگی جہاز 1200 میزائلوں کے ساتھ ان کے ملک کو نشانہ بنا رہے ہیں، جو مجرمانہ اور خونریز دھمکی ہے۔
ڈان اخبار میں شائع فرانسیسی خبر رساں ادارے ’اے ایف پی‘ کی رپورٹ کے مطابق امریکا، مادورو پر منشیات کے ایک کارٹیل کی قیادت کرنے کا الزام لگاتا ہے، اور جنوبی کیریبین میں انسدادِ منشیات آپریشن کے تحت جنگی جہاز بھیجنے کا اعلان کیا ہے۔
کراکاس میں پیر کو بین الاقوامی میڈیا سے ملاقات میں صدر نکولس مادورو نے کہا کہ ہمارے براعظم نے پچھلے 100 برسوں میں سب سے بڑا خطرہ دیکھا ہے، 8 بحری جنگی جہازوں کی صورت میں جن پر ایک ہزار 200 میزائل ہیں اور ایک آبدوز بھی ہے جو وینزویلا کو نشانہ بنا رہی ہے۔
وینزویلا کے صدر کے 2024 اور 2018 کے حالیہ دونوں انتخابات کو امریکا اور عالمی برادری کے بیشتر ممالک نے تسلیم نہیں کیا ہے۔
نکلوس مادورو نے کہا کہ زیادہ سے زیادہ فوجی دباؤ کے جواب میں ہم نے وینزویلا کے دفاع کے لیے زیادہ سے زیادہ تیاری کا اعلان کیا ہے۔
واشنگٹن نے مادورو کی گرفتاری پر انعام کی رقم دگنی کر کے 5 کروڑ ڈالر کر دی ہے لیکن وینزویلا پر حملے کی کوئی سرکاری دھمکی نہیں دی۔
کراکاس نے کہا ہے کہ وہ اپنے علاقائی پانیوں کی نگرانی کرے گا اور امریکی ’دھمکیوں‘ کے جواب میں 40 لاکھ سے زائد ملیشیا اراکین کو متحرک کرے گا۔
مادورو نے افسوس ظاہر کیا کہ امریکا کے ساتھ رابطے کے چینلز ختم ہو گئے اور عزم ظاہر کیا کہ ان کا ملک ’کسی بھی قسم کے دباؤ یا دھمکی کے آگے کبھی نہیں جھکے گا‘۔
مادورو نے امریکی صدر ڈونلڈ ٹرمپ کو خبردار کیا کہ ان کے وزیرِ خارجہ مارکو روبیو انہیں وینزویلا کے عوام کے خلاف قتلِ عام کے ساتھ خونریزی کی طرف دھکیلنا چاہتے ہیں۔
لائیو ٹی وی