ٹرائی نیشن سیریز کا چوتھا مقابلہ: افغانستان نے پاکستان کو 18 رنز سے شکست دے دی
سہہ ملکی ٹی 20 سیریز کے اہم میچ میں افغانستان نے پاکستان کو 18 رنز سے شکست دے دی، افغان اسپنرز نے 6 پاکستانی کھلاڑیوں کا شکار کیا۔
شارجہ کرکٹ اسٹیڈیم میں سہ فریقی سیریز کے چوتھے میچ میں پاکستانی ٹیم 170 رنز کے ہدف کے تعاقب میں 9 وکٹوں کے نقصان پر 151 رنز پر ہی ہمت ہار گئی، افغانستان کے اسپنرز نور احمد، راشد خان، محمد نبی اور فاسٹ باؤلر فضل حق فاروقی نے2،2 وکٹیں اپنے نام کیں۔
پاکستان کی جانب سے حارث رؤف 16 گیندوں پر 34 رنز بنا کر ناٹ آؤٹ رہے، اوپنر بیٹر فخر زمان 25، کپتان سلمان علی آغا 20 رنز بنا کر آؤٹ ہوئے، صاحب زادہ فرحان 18 رنز بنا کر پویلین واپس لوٹے۔
فہیم اشرف 14، محمد نواز 12، حسن نواز 9 اور آؤٹ آف فارم محمد حارث ایک رن بنا کر آؤٹ ہوئے، اوپنر صائم ایوب اور شاہین شاہ آفریدی کھاتہ بھی کھول نہ سکے۔
اس سے قبل، افغانستان نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 169 رنز بنائے، افغان ٹاپ آرڈر بیٹر ابراھیم زادران 65 اور صدیق اللہ اتل 64 رنز بنا کر نمایاں رہے۔
پاکستانی میڈیم فاسٹ باؤلر فہیم اشرف نے 27 رنز دے کر 4 وکٹیں اپنے نام کیں، صائم ایوب کے حصے میں ایک وکٹ آئی۔
شاہین شاہ آفریدی، حارث رؤف، صفیان مقیم اور محمد نواز کوئی وکٹ حاصل نہیں کر سکے۔
پاکستانی ٹیم میں 2 تبدیلیاں کی گئیں، فاسٹ باؤلر سلمان مرزا اور حسن علی کی جگہ شاہین آفریدی اور حارث رؤف کی فائنل الیون میں واپسی ہوئی ہے۔
واضح رہے کہ پاکستان نے ٹرائی نیشن سیریز کے پہلے میچ میں افغانستان کو 39 رنز سے جب کہ دوسرے مقابلے میں متحدہ عرب امارات (یو اے ای) کو 31 رنز سے شکست دے تھی۔
لائیو ٹی وی