بیجنگ: وزیراعظم کا آنژن ہسپتال کا دورہ، موثر نظام اور بہترین خدمات کی فراہمی کو سراہا
وزیراعظم شہباز شریف نے چین کے دارالحکومت بیجنگ میں آنژن ہسپتال کا دورہ کیا، جہاں انہوں نے موثر نظام ، جدید ٹیکنالوجی اور بہترین خدمات کی فراہمی پر انتظامیہ کو سراہا۔
ڈان نیوز کے مطابق وزیراعظم نے بیجنگ میں آنژن ہسپتال کے دورے کے دوران ہسپتال میں دستیاب سہولتوں کا معائنہ کیا اور اسلام آباد کے ہسپتالوں میں بھی چین جیسی سہولتیں فراہم کرنے کی ہدایت کردی۔
اس دوران، وزیراعظم کو آنژن ہسپتال میں موجود سہولیات کے حوالے سے بریفنگ دی گئی، وزیراعظم کو دورے میں ہسپتال میں دستیاب صحت کی سہولیات اور مؤثر انتظام کے لیے موجود روبوٹس اور دیگر جدید ٹیکنالوجی کی سہولیات کا معائنہ کرایا گیا۔
دورے میں نائب وزیراعظم و وزیر خارجہ اسحٰق ڈار، وزیر داخلہ محسن رضا نقوی، وفاقی وزیر منصوبہ بندی و ترقی احسن اقبال، وزیر خزانہ محمد اورنگزیب، وفاقی وزیر اطلاعات و نشریات عطا اللہ تارڑ اور اعلیٰ افسران شریک تھے۔
وزیراعظم نے ہسپتال میں دستیاب سہولیات کا معائنہ کیا اور ہسپتال میں مؤثر نظام، جدید ٹیکنالوجی اور بہترین خدمات کی فراہمی پر ہسپتال انتظامیہ کی تعریف کی ۔
وزیراعظم نے وفاقی وزیر داخلہ محسن نقوی اور محکمہ صحت کو اسلام آباد میں زیر تعمیر منصوبوں میں آنژن ہسپتال کی طرز پر انفرااسٹرکچر قائم کرنے کی ہدایت کی۔
شہباز شریف نے حکم دیا کہ پاکستان میں زیر تعمیر ہسپتالوں میں چین جیسی معیاری سہولتوں کی فراہمی کو ترجیح دی جائے۔
لائیو ٹی وی