ایسے ایسے سوالات

ای میل

فیلڈ میں "ذرا ہٹ کے" کے بارے میں بھی مجھ سے بکثرت ایسے سوالات ہوتے ہیں جو خود بھی ذرا ہٹ کے ہوتے ہیں۔

مثلاً یہ کہ ہم ایسی آسانی سے کیسے بڑی بڑی نازک باتیں کر لیتے ہیں، کیا خوف محسوس نہیں ہوتا؟ کیا کبھی کسی نامعلوم نمبر سے فون تو نہیں آیا؟ کیا کوئی گاڑی یا موٹر سائیکل تو کبھی پیچھے نہیں لگی؟ احتیاط کیا کریں، دیواروں کے بھی کان ہوتے ہیں۔

چینل مالکان کا پریشر تو ضرور آتا ہوگا؟ کیا؟ آپ اپنے موضوعات خود چنتے ہیں، ڈونٹ ٹیل می، نہیںںںںںں۔ آپ لوگ اتنی ریسرچ کیسے کر لیتے ہیں؟ اس کے لیے تو بہت پڑھنا پڑھتا ہوگا۔ یہ اندر کی خبر آپ کو کیسے پتہ چل جاتی ہے؟

اچھا سچ سچ بتائیں، آپ ضرار اور مبشر سٹوڈیو سے باہر بھی اتنا ہی ہنسی مذاق کرتے ہیں؟ آپ کیا بچپن کے دوست ہیں؟ آپ کا ضرار سے کیا پرابلم ہے؟ آپ لوگ ایک دوسرے کو نیچا دکھانے کی کوشش کیوں کرتے ہیں؟

اچھا یہ بتائیں آپ میں سب سے زیادہ پڑھا لکھا کون ہے؟ مجھے تو ضرار شکل سے بہت پڑھاکو لگتا ہے۔ کھوڑو کیا گجراتی ہوتے ہیں؟ آپ نے بھی کچھ کتابیں وغیرہ تو ضرور پڑھی ہوں گی۔ بتائیں نا سچی سچی۔

یہ مبشر زیدی سو لفظوں کی کہانی والے ہی ہیں نا؟ نہیں؟ تو پھر وہ والے مبشر زیدی کا یہ والے مبشر زیدی سے کیا رشتہ ہے؟

آپ کا پروگرام کسی روز بھی بند ہوجائےگا، شرط لگالیں۔

کوئی بتلاؤ کہ ہم بتلائیں کیا.