ایل او سی پر خاتون کی ہلاکت:پاکستان کا بھارت سے احتجاج
اسلام آباد: پاکستان نے لائن آف کنٹرل (ایل او سی) پر بلااشتعال فائرنگ سے خاتون کی ہلاکت پر بھارت سے شدید احتجاج کیا۔
دفتر خارجہ سے جاری بیان کے مطابق ڈی جی جنوبی ایشیا اور سارک ڈاکٹر فیصل بھارتی ڈپٹی ہائی کمشنر جے پی سنگھ کو طلب کرکے احتجاجی مراسلہ ان کے حوالے کیا۔
مراسلے میں کہا گیا ہے کہ 7 اگست کو کھوئی رٹہ اور کیرالا سیکٹرز میں بھارتی افواج نے بلااشتعال فائرنگ کی، جس میں 45 سالہ خاتون منیر بی بی جاں بحق جبکہ ایک اور خاتون زخمی ہوگئیں۔
مراسلے میں مزید کہا گیا ہے کہ بھارت فائر بندی معاہدے کی پابندی کرے، جان بوجھ کر عام شہریوں کو نشانہ بنانا انسانی اقدار اور عالمی قوانین کی خلاف ورزی ہے۔
ڈی جی جنوبی ایشیا نے زور دیا کہ بھارت اقوام متحدہ کے مبصرین کو سیکیورٹی کونسل کی قرارداد کے مطابق اپنے فرائض انجام دینے کی اجازت دے۔
دفتر خارجہ کے بیان میں کہا گیا کہ 2017 میں اب تک بھارتی افواج 600 سے زائد بار ایل او سی اور ورکنگ باؤنڈری پر سیز فائر معاہدے کی خلاف ورزی کر چکی ہیں۔
بلااشتعال فائرنگ کے نتیجے میں 25 معصوم شہری جان سے ہاتھ دھو بیٹھے اور 110 سے زائد زخمی ہوئے۔
سال 2016 میں بھارت نے 382 بار ٰلائن آف کنٹرول پر سیز فائر معاہدے کی خلاف ورزی کی تھی۔
لائیو ٹی وی