بیلجیئم ورلڈ کپ سیمی فائنل میں پہنچ گیا، نیمار کی برازیل باہر
ماسکو: فیفا فٹبال ورلڈ کپ کے دوسرے کوارٹر فائنل میں بیلجیئم نے پانچ مرتبہ کی عالمی چیمپیئن برازیل کو 1-2 سے شکست دے کر سیمی فائنل کے لیے کوالیفائی کرلیا۔
جمعہ کو کازان ارینا میں کھیلے گئے میچ میں عالمی نمبر دو برازیل کی ٹیم کا سامنا عالمی نمبر تین بیلجیئم ٹیم سے تھا اور ورلڈ کپ کے لیے فیورٹ قرار دی جانے والی ان دونوں ٹیموں کے درمیان میچ کی وجہ سے اس مقابلے کو بہت زیادہ اہمیت حاصل تھی۔
میچ کے آغاز سے قبل ہی برازیل کی ٹیم نسبتاً دباؤ کا شکار تھی کیونکہ انہیں اس میچ میں اپنے سب سے اہم دفاعی کھلاڑی کیسامیرو کی خدمات حاصل نہیں تھیں۔
میچ کی ابتدا میں ہی کیسامیرو کی غیرموجودگی میں برازیل کے دفاع میں موجود خامیاں کھل کر سامنے آ گئیں اور بیلجیئم کی ٹیم نے اس کا بھرپور فائدہ اٹھاتے ہوئے بھرپور حملے کیے۔
میچ کے 13ویں ہی منٹ میں بیلجیئم کو ایک کارنر ملا جس پر برازیل کے اون گول کی بدولت انہوں نے برتری حاصل کی۔
تاہم برازیل کو بڑا دھچکا اس وقت لگا جب رومیلو لوکاکو نے میچ کے 31ویں منٹ میں شاندار موو بنائی اور کیون ڈی برون نے گول اسکور کر کے اپنی ٹیم کی برتری دگنی کردی۔
Half time#Brazil 0 🇧🇷#Belgium 2 🇧🇪
— jungle emperor (@mamadi56) July 6, 2018
😲😦#BrasileBelgio#Brazil vs Belgium#BRABEL pic.twitter.com/E6oHgdhRQh
میچ کے پہلے ہاف میں بیلجیئم کی ٹیم مکمل طور پر چھائی رہی اور پہلا ہاف بیلجیئم کی 2-0 کی برتری کے ساتھ اختتام پذیر ہوا۔
میچ کے دوسرے ہاف میں برازیل کی ٹیم واضح طور پر میچ واپسی کے عزم کے ساتھ میدان میں اتری اور ٹیم کی باڈی لینگویج میں بھی واضح تبدیلی نظر آئی۔
میچ کے 73ویں منٹ میں برازیل نے تبدیلی کرتے ہوئے ریناٹو آگسٹو کو میدان میں بھیجا اور تین منٹ بعد ہی انہوں نے ہیڈر کے ذریعے خوبصورت گول کر کے خسارے کو کم کردیا۔
اس کے بعد برازیل کی ٹیم نے پے درپے حملے کیے جس کے نتیجے میں انہیں گول کرنے کے چند نادر مواقع ملے لیکن حیران کن طور پر برازیل کی ٹیم ان تین سے چار مواقعوں میں سے ایک کو بھی گول میں تبدیل نہ کر سکی۔
#Brazil scores their first goal against #Belgium. #BRABEL #brazilvsbelgium #BelgiumvsBrazil pic.twitter.com/cVK2xdsG0p
— The real fresh prince (@Nutt_King_Cole) July 6, 2018
میچ کے اختتام سے محض چند منٹ قبل برازیل کے نیمار نے گول کی جانب ایک شاندار کک لگائی لیکن بیلجیئم کے گول کیپر نے عمدہ کوشش کے ذریعے اس یقینی گول کو بچا لیا اور یوں برازیل کی میچ میں واپسی کی یہ آخری امید بھی دم توڑ گئی۔
جب میچ ختم ہوا تو 1-2 کا اسکور بیلجیئم کی کامیابی اور پانچ مرتبہ کی عالمی چیمپیئن برازیل کے عالمی کپ سے اخراج کا اعلان کر رہا تھا۔
اس میچ میں فتح کے ساتھ ہی بیلجیئم کی ٹیم نے 1986 کے بعد پہلی مرتبہ ورلڈ کپ کے سیمی فائنل کے لیے کوالیفائی کر لیا جہاں اس کا مقابلہ 1998 کی عالمی چیمپیئن فرانس سے ہو گا۔
لائیو ٹی وی