گزشتہ دنوں اٹلی کے خودمختار علاقے سسلی کے ایک چھوٹے سے قصبے میں گھروں کو محض ایک یورو (160 پاکستانی روپے کے قریب) میں فروخت کرنے کی پیشکش کی گئی تھی مگر اسی ملک کے ایک اور مقام میں اس سے بھی بہتر آفر سامنے آگئی ہے۔

شمالی اٹلی میں کوہ الپس کے دامن میں واقع قصبے لوکانا نے درحقیقت وہاں لوگوں کو بسانے کے لیے وہاں آنے پر 9 ہزار یورو (لگ بھگ 15 لاکھ روپے) دینے کی پیشکش کردی ہے۔

جی ہاں اگر آپ بیرون ملک منتقل ہونا چاہتے ہیں تو اٹلی کے اس مضافاتی علاقے میں منتقل ہونے پر آپ کو خرچہ نہیں کرنا پڑے گا بلکہ آپ کو اس کا معاوضہ دیا جائے گا۔

اٹلی کے اکثر مقامات پر ہزاروں گھر خالی پڑے ہیں جو بہت بڑا مسئلہ ہے جس کا حل اکثر مختلف قسم کی پرکشش آفرز کی شکل میں پیش کیا جاتا ہے۔

لوکانا کی انتظامیہ کو بھی توقع ہے کہ مالی انعام نئے رہائشیوں کو وہاں آنے پر مجبور کرنے کے لیے کافی ہوگا اور خالی ہوجانے والے مکانات، دکانیں اور ریسٹورنٹس پھر آباد ہوسکیں گے۔

اس قصبے کے میئر گیونی برونو نے سی این این سے بات کرتے ہوئے بتایا کہ 1900 کی دہائی میں ہماری آبادی 7 ہزار تھی جو اب بمشکل ڈیڑھ ہزار رہ گئی ہے کیونکہ لوگ روزگار کے لیے دیگر علاقوں میں منتقل ہوگئے، طالبعلم نہ ہونے پر اسکولوں کی بندش کا خطرہ ہے اور میں ایسا نہیں ہونے دوں گا?۔

اس طرح کی دلچسپ آفرز کے ساتھ کچھ شرائط بھی ہوتی ہیں اور لوکانا میں آپ کو اپنے پلے سے مزید خرچے کی ضرورت نہیں مگر اپنے ساتھ ایک بچے کو ضرور لے جانا ہوگا جبکہ تنخواہ کم از کم 6 ہزار یورو ہونی چاہئے۔

پھر آپ کو وہاں مستقل قیام کرنا ہوگا اور 3 سال بعد یہ 15 لاکھ روپے آپ کو ادا کردیئے جائیں گے۔

اس قصبے میں بچوں کی پیدائش کے مقابلے میں مرنے والوں کی شرح زیادہ ہے، پہلے معاوضے کی پیشکش محض اطالوی شہریوں تک محدود تھی مگر اب اسے بیرون ملک سے آنے والوں کے لیے بھی متعارف کرادیا گیا ہے۔

مقامی انتظامیہ کے مطابق ہم نوجوانوں اور پروفیشنل افراد کی توجہ چاہتے ہیں جو گھر بیٹھے کام کرسکیں یا نئے روزگار کے لیے یہاں کام شروع کرسکیں۔

یہاں درجنوں دکانیں، ریسٹورنٹس اور بوتیکس موجود ہیں جو ایسے افراد کے منتظر ہیں جو انہیں چلاسکیں۔

یہ پہاڑی قصبہ اسکائنک، کلائمبنگ، بائیکنگ اور صاف شفاف ہوا کے لیے بہترین مقام ہے۔

دوسری جانب سوئٹزر لینڈ کی سرحد کے قریب واقع ایک اور اطالوی قصبے Borgomezzavalle میں نہ صرف گھر ایک یورو میں فروخت کیا جارہا ہے بلکہ وہاں بسنے والوں کو ایک ہزار یورو معاوضہ جبکہ کاروبار شروع کرنے والوں کو 2 ہزار یورو دیئے جائیں گے۔

تاہم اس پیشکش کو قبول کرنے والے افراد کو گھر خریدنے کے بعد اپنی جائیداد کی تزئین نو 2 سال کے اندر کرنا ہوگی۔