کوئٹہ گلیڈی ایٹرز کا پریکٹس میچ لائیو دکھانے کا اعلان

اپ ڈیٹ 09 فروری 2019

ای میل

کوئٹہ گلیڈی ایٹرز اور ملتان سلطانز کے درمیان پریکٹس میچ 13 فروری کو کھیلا جائے گا  — فوٹو بشکریہ ندیم عمر ٹوئٹر اکاؤنٹ
کوئٹہ گلیڈی ایٹرز اور ملتان سلطانز کے درمیان پریکٹس میچ 13 فروری کو کھیلا جائے گا — فوٹو بشکریہ ندیم عمر ٹوئٹر اکاؤنٹ

کوئٹہ گلیڈی ایٹرز نے پہلی مرتبہ پاکستان سپر لیگ (پی ایس ایل) سے قبل ٹیم کے پریکٹس میچ کو براہ راست دکھانے کا اعلان کردیا۔

پی ایس ایل کی فرنچائز 'کوئٹہ گلیڈی ایٹرز' نے اپنے مداحوں کو ایونٹ کے آغاز سے قبل ہی کھیل کے میدان سے اپنا کھیل دکھانے کا فیصلہ کرلیا۔

سماجی رابطے کی ویب سائٹ 'ٹوئٹر' پر کوئٹہ گلیڈی ایٹرز کی جانب سے اعلان کیا گیا کہ وہ 'پی ایس ایل' کے افتتاح سے قبل ہونے والے پریکٹس میچ کو براہ راست دکھائیں گے۔

تاہم گلیڈی ایٹرز کی جانب سے یہ میچ ٹی وی پر نہیں بلکہ یوٹیوب پر براہِ راست دکھایا جائے گا۔

خیال رہے کہ اس اقدام کے بعد کوئٹہ گلیڈی ایٹرز پریکٹس میچ کو لائیو دکھانے والی پاکستان سپر لیگ کی پہلی ٹیم بن جائے گی۔

سماجی رابطے کی ویب سائٹ پر ہی اس پریکٹس میچ کے وقت کی تفصیلات بھی بتائی گئیں جو کوئٹہ گلیڈی ایٹرز اور ملتان سلطانز کے درمیان 13 فروری کو کھیلا جائے گا اور یہ میچ پاکستانی وقت کے مطابق تقریباً 6 بجے شروع ہوگا۔

یاد رہے کہ ایک روز قبل کوئٹہ گلیڈی ایٹرز کی جانب سے پیغامات کی ویب سائٹ 'اسنیپ چیٹ' میں ایک فلٹر متعارف کروایا گیا تھا جس کی مدد سے فینز اپنی کوئٹہ گلیڈی ایٹرز کے بیٹنگ ہیلمٹ کے ساتھ اپنی تصویر بناسکتے ہیں۔