ملک بھر میں 6 ستمبر کو یوم دفاع، یوم یکجہتی کشمیر کے طورپر منایا گیا جس کامقصد ملک و قوم کے لیے جانوں کا نذرانہ پیش کرنے والے شہدا کے ساتھ ساتھ بھارت کے زیر تسلط کشمیر میں مظلوم کشمیریوں کے ساتھ اظہارِ یکجہتی کرنا تھا۔

نمازِ فجر کے بعد ملک کی ترقی و خوشحالی اور مقبوضہ کشمیر کی آزادی کے لیے خصوصی دعائیں مانگ کر یومِ دفاع کا آغاز کیا گیا۔

یوم دفاع کے موقع پر وفاقی دارالحکومت اسلام آباد میں دن کا آغاز 31 جبکہ صوبائی دارالحکومتوں میں21،21 توپوں کی سلامی سے ہوا۔

علاوہ ازیں بانی پاکستان قائد اعظم محمد علی جناح اور علامہ اقبال کے مزارات پر گارڈز کی تبدیلی کی پُروقار تقاریب منعقد ہوئیں، جس میں پاک فضائیہ نے مزارِ قائد جبکہ پاک فوج نے مزار اقبال پر گارڈز کے فرائض سنبھالے۔

شہداء کو خراج عقیدت پیش کرنے کے لیے یوم دفاع کی مرکزی تقریب جنرل ہیڈکوارٹرز (جی ایچ کیو) راولپنڈی میں ہوئی جس میں آرمی چیف جنرل قمر جاوید باجوہ بطور مہمانِ خصوصی شریک ہوئے۔

یوم دفاع کی مناسبت سے وزارت داخلہ کی جانب سے جاری نوٹی فکیشن کے مطابق سہ پہر 3 بجے ملک بھر میں تمام دفاتر بند کردیے گئے جس کے بعد پاکستان کے عوام نے کشمیریوں کے حق میں ریلیاں نکالیں اور مظاہرے کیے۔