پاکستان نے سری لنکا کے خلاف تیسرے میچ میں 5 وکٹوں سے کامیابی حاصل کرکے تین میچوں کی سیریز 0-2 سے جیت لی۔

سری لنکا نے دھنشکا گونا تھیلاکا کی شاندار سنچری کی بدولت پاکستان کو سیریز کے تیسرے اور آخری ون ڈے میچ میں فتح کے لیے 298 رنز کا ہدف دیا تھا جس کو پاکستان نے بلے بازوں کی ذمہ دارانہ کارکردگی کے بدولت 49ویں اوور میں حاصل کرلیا۔

نیشنل اسٹیڈیم کراچی میں کھیلے گئے سیریز کے تیسرے ون ڈے میچ میں سری لنکا نے ٹاس جیت کر پہلے خود بیٹنگ کا فیصلہ کیا تھا جس کے بعد 13 کے مجموعے پر آوشکا فرنینڈو صرف چار رنز بنا کر محمد عامر کی وکٹ بن گئے تھے۔

اس موقع پر گوناتھیلاکا کا ساتھ دینے کپتان لہیرو تھریمانے آئے اور دونوں کھلاڑیوں نے عمدہ کھیل پیش کرتے ہوئے اپنی ٹیم کی سنچری مکمل کرائی۔

مزید پڑھیں: پاکستان اور سری لنکا کے درمیان دوسرا ون ڈے میچ اتوار کو نہیں ہوگا

88 رنز کی اس شراکت کے خاتمے لیے کپتان سرفراز احمد اسپنر محمد نواز کو باؤلنگ پر لائے اور انہوں نے کپتان کے اعتماد پر پورا اترتے ہوئے اپنے پہلے ہی اوور میں سری لنکن کپتان کی وکٹ حاصل کر لی، تھریمانے نے 36رنز کی اننگز کھیلی۔

دوسرے اینڈ سے گوناتھیلاکا نے عمدہ کھیل جاری رکھا اور اپنی نصف سنچری مکمل کرنے کے ساتھ ساتھ اینجلو پریرا کے ساتھ مزید 50رنز کی ساجھے داری قائم کی، پریرا 13 رنز ہی بنا سکے۔

تین وکٹیں گرنے کے بعد گونا تھیلاکا کا ساتھ دینے منود بھنوکا آئے اور دونوں کھلاڑیوں نے 74رنز کی شراکت قائم کر کے اپنی ٹیم کے بڑے اسکور کی راہ ہموار کی جبکہ اس دوران اوپننگ بلے باز نے اپنی سنچری بھی مکمل کر لی۔

اس شراکت کا خاتمہ اس وقت ہوا جب وکٹوں کے درمیان غلط فہمی کے نتیجے میں بھنوکا کی 36رنز کی اننگز اختتام کو پہنچی جبکہ شیہان جے سوریا بھی صرف تین رنز بنا سکے۔

243 کے مجموعی اسکور پر گوناتھیلاکا کی ہمت بھی جواب دے گئی اور وہ کیریئر کی بہترین 133 رنز کی اننگز کھیلنے کے بعد محمد عامر کی دوسری وکٹ بن گئے، ان کی اننگز میں 16 چوکے اور ایک چھکا شامل تھا۔

یہ بھی پڑھیں: 'تم بہت سیکسی ہو'، نازیبا زبان کے استعمال پر ٹینس امپائر پر پابندی

اختتامی اوورز میں داسن شناکا نے جارحانہ بیٹنگ کی جس کی بدولت سری لنکا کی ٹیم مقررہ اوورز میں 9 وکٹوں کے نقصان پر 297 رنز بنانے میں کامیاب رہی۔

شناکا اننگز کی آخری گیند پر وہاب ریاض کی وکٹ بن گئے تاہم آؤٹ ہونے سے قبل 24 گیندوں پر 2 چھکوں اور تین چوکوں کی مدد سے 43رنز بنا چکے تھے۔

پاکستان کی جانب سے محمد عامر تین وکٹیں لے کر سب سے کامیاب باؤلر رہے جبکہ وہاب ریاض کو 2 وکٹوں کے لیے 81 رنز کی پٹائی برداشت کرنا پڑی۔

سیریز میں اپنا پہلا میچ کھیلنے والے عابد علی نے فخر زمان کے ساتھ بہترین آغاز کیا اور دونوں اوپنرز نے 123 رنز کی شان دار شراکت قائم کرکے ٹیم کی جیت کی بنیاد رکھی۔

عابد علی 74 رنز بنا کر آؤٹ ہوئے جس کے بعد بابر اعظم نے فخرزمان کا ساتھ دیا تاہم وہ صرف 31 رنز بنا سکے جبکہ فخر زمان نے 91 گیندوں پر 76 رنز کی ایک سست اننگز کھیلی، کپتان سرفراز بھی صرف 23 رنز بنا سکے۔

حارث سہیل نے ذمہ دارانہ انداز میں کھیلتے ہوئے 50 گیندوں پر 56 رنز بنائے اور ٹیم کو جیت کے قریب لاکھڑا کیا جس کو افتخار احمد نے 3 چوکوں اور ایک چھکے کی مدد سے حاصل کرلیا۔

پاکستان نے 49 ویں اوور کی دوسری گیند پر 299 رنز بنا کر میچ کے ساتھ سیریز بھی اپنے نام کر لی۔

افتخار احمد 28 اور وہاب ریاض ایک رن بنا کر ناقابل شکست رہے۔

عابد علی کو میچ کا بہترین کھلاڑی قرار دیا گیا۔

اس سے قبل سری لنکن ٹیم کے کپتان لہیرو تھری مانے نے نیشنل اسٹیڈیم کی پچ کو بیٹنگ کے لیے موزوں قرار دیتے ہوئے کہا کہ ٹیم کی فائنل الیون میں تین تبدیلیاں کی گئیں۔

مزید پڑھیں: سری لنکا سے ٹی20 سیریز: قومی اسکواڈ میں احمد شہزاد اور عمر اکمل کی واپسی

سری لنکا نے سدیرا سماراوکراما، اسورو یوڈانا اور اوشادا فرنینڈو کی جگہ منود بھنوکا، لکشن سنداکن اور اینجلو پریرا کو ٹیم میں شامل کر لیا تھا۔

پاکستانی ٹیم کے کپتان سرفراز احمد نے کہا کہ اگر وہ بھی ٹاس جیت کر پہلے بیٹنگ کا فیصلہ کرتے اور میچ کے لیے ٹیم میں دو تبدیلیوں کا اعلان کیا۔

سرفراز احمد کا کہنا تھا کہ عماد وسیم کی جگہ محمد نواز اور امام الحق کی جگہ عابد علی کو ٹیم کا حصہ بنایا گیا ہے۔

واضح رہے کہ 30 ستمبر کو بابر اعظم کی سنچری اور عثمان خان شنواری کی شاندار باؤلنگ کی بدولت پاکستان نے سری لنکا کو دوسرے ون ڈے میچ میں 67 رنز سے شکست دے کر 3 میچوں کی سیریز میں 0-1 کی برتری حاصل کر لی تھی۔

اس سے قبل سیریز کا پہلا میچ کراچی کے نیشنل اسٹیڈیم میں کھیلا جانا تھا لیکن شدید بارش کے بعد میدان میں پانی جمع ہوگیا تھا جس کے باعث میچ منسوخ کردیا گیا تھا۔

یہ بھی پڑھیں: چیئرمین پی سی بی کی دنیائے کرکٹ سے پاکستان آ کر میچ کھیلنے کی درخواست

تاہم بارش کے باعث آؤٹ فیلڈ کی تیاری میں 2 روز کا وقت درکار ہونے کے پیشِ نظر اتوار کو ہونے والے میچ کو بھی پیر تک ملتوی کردیا گیا تھا۔

واضح رہے کہ قومی کرکٹ ٹیم میں کپتان سرفراز احمد، عابد علی، فخر زمان، بابر زمان، حارث سہیل، شاداب خان، محمد نواز، محمد عامر، وہاب ریاض، محمد حسنین، محمد رضوان افتخار احمد، آصف علی اور عثمان خان شنواری شامل ہیں۔

مزیدپڑھیں: عالمی برادری پاکستان میں انٹرنیشنل کرکٹ کی واپسی کیلئے حمایت کرے، سرفراز

دوسری جانب سری لنکن ٹیم کپتان لہرو تھری مانے، دنوشکا گناتھیکالا، اوشادا فرنینڈو، سدیراسمارا وکراما، شیہان ھؤ جے سوریا، دسون شناکا، ونندو ہسارنگا، اینجیلو پریرا، مِنود بھنوسکا، اسورو اڈانا، نوان پریدپ، کسون رجیتھا، لہرو کمارا، لاکشن سنڈکن پر مشتمل ہے۔