پاکستان کی نامور جوڑی اداکارہ اقرا عزیز اور یاسر حسین کی شادی کی تقریبات کا آغاز رواں سال 24 دسمبر کو مایوں کی تقریب کے ساتھ ہوا اور اب ان کی مہندی کی تقریبات کی تصاویر اور ویڈیوز بھی سوشل میڈیا پر گردش کررہی ہیں۔

ویسے تو اقرا عزیز نے اپنے مایوں کی رسم کے دوران زرد رنگ کا جوڑا زیب تن کیا جس کے بعد مداحوں کو ایسا لگ رہا تھا کہ وہ مہندی کی تقریب میں شاید روایتی طور پر سبز رنگ کے جوڑے کا انتخاب کریں گی۔

البتہ اداکارہ اپنی مہندی کی تقریب میں بھی زرد رنگ کی انارکلی فراک میں نظر آئیں جو ڈیزائنر فائزہ ثقلین نے تیار کی، دوسری جانب یاسر حسین سفید شلوار قمیض میں نظر آئے۔

اقرا اور یاسر نے اپنی مہندی کی تقریب میں کئی بولی وڈ گانوں پر رقص بھی کیا جس کی ویڈیو سوشل میڈیا پر وائرل ہوئی۔

جہاں مایوں کی تقریب سادگی سے گھر پر منعقد کی گئی تھی وہیں ان کی مہندی میں پاکستانی شوبز انڈسٹری سے تعلق رکھنے والی کئی نامور شخصیات نے شرکت کی۔

s

اقرا اور یاسر کی مہندی میں عاصم اظہر ہانیہ عامر کے ہمراہ نظر آئے، تو سجل علی اور احد رضا میر نے اکٹھے شرکت کی۔

اداکارہ ایمن بھی اپنے شوہر منیب بٹ اور بہن منال خان کے ساتھ تقریب کا حصہ بنیں۔

اس موقع پر اداکارہ زارا نور عباس نے اپنے شوہر اور اداکارہ کبریٰ خان کے ساتھ ایک بولی وڈ گانے پر رقص بھی کیا۔

یاد رہے کہ رواں ماہ کے آغاز میں دونوں اداکاروں نے اعلان کیا تھا کہ یہ اس ماہ کے آخر تک شادی کے بندھن میں بندھ جائیں گے۔