آج کل پاکستان کے کئی ستارے سوشل میڈیا پر یہ انکشاف کررہے ہیں کہ وہ اپنی زندگی میں انزائٹی کا شکار رہے۔

اداکارہ ارمینہ رانا خان نے بھی اپنے انسٹاگرام پر ایک پوسٹ شیئر کی جس میں انہوں نے بتایا کہ وہ اپنی زندگی میں انزائٹی کے ساتھ ساتھ کئی اور مسائل کا شکار بھی ہوچکی ہیں۔

جبکہ انہوں نے مداحوں کو اس کیفیات سے نکلنے کے مشورے بھی دیے۔

'میں کافی روز سے اس بات پر غور کررہی تھی کہ یہ پوسٹ کروں یا نہیں، لیکن اب وقت آگیا ہے کہ میں اپنے اس سفر کی چھوٹی سی کہانی آپ کے ساتھ شیئر کروں، تو اس دہائی میں مجھے بھوک کی کمی، انزائٹی اور احساس کمتری جیسے مسائل کا سامنا کرنا پڑا'۔

مزید پڑھیں: 'انزائٹی کا شکار ضرور ہوں لیکن شرمندہ نہیں'

انہوں نے اپنی دو تصاویر اس پوسٹ کے ساتھ شیئر کی اور لکھا کہ 'یہاں میرا وزن صرف 39 کلو تھا کیوں کہ میری خوراک بہت کم تھی، میں بہت بیمار تھی، میں یہ کہانی اس لیے شیئر کررہی ہوں کیوں کہ میں مظلوم نہیں جیتنے والی ہوں، میں نے ان تمام مسائل پر قابو پایا اور گزشتہ کچھ سالوں میں یہی میری سب سے بڑی کامیاب رہی'۔

ارمینہ کے مطابق 'اب میں اپنے آپ سے خوش ہوں، میں وہ کھاتی ہوں جو صحت کے لیے ٹھیک ہو، یہ پوسٹ کرنے کی میری واحد وجہ یہ تھی کہ میں آپ کو بتا سکوں کہ چاہے کچھ بھی ہو آپ خوبصورت ہیں پھر چاہے آپ کا وزن کتنا بھی ہو، کسی کو یہ اجازت نہ دیں کہ وہ آپ پر تنقید کرے، اس دنیا میں اگر کوئی بات سب سے ضروری ہے تو وہ یہ کہ آپ صحت مند ہوں، ہر وہ شخص جو ان خطرناک مسائل سے دوچار ہے، میں اپنا پیار ان کو دیتی ہوں اور دعا ہے کہ وہ بھی ان مسائل سے خود کو نجات دلا سکیں'۔

یہ بھی پڑھیں: 'میں کبھی بھی اداکار بننے کا خواہشمند نہیں تھا'

ارمینہ کی اس پوسٹ پر اداکارہ کبریٰ خان نے بھی کمنٹ کی اور اپنی کہانی شیئر کرنے کے لیے انہیں سراہا۔

خیال رہے کہ چند روز قبل اداکار عدنان ملک نے انسٹاگرام پر اپنے ڈرامے 'صدقے تمہارے' کا ایک کلپ شیئر کرتے ہوئے انکشاف کیا تھا کہ وہ اداکاری کرنے کے شوقین نہیں کیوں کہ اس سے انہیں انزائٹی ہوتی ہے۔

جبکہ کچھ روز بعد ہی اداکارہ ماورا حسین نے بھی اپنے ڈرامے 'داسی' کی کلپ شیئر کرتے ساتھ لکھا تھا کہ وہ انزائٹی کا شکار ہیں۔