پاکستان سپرلیگ (پی ایس ایل) 2020 کے 15ویں میچ میں کراچی کنگز نے پشاور زلمی کو 6 وکٹوں سے شکست دے کر 6 پوائنٹس حاصل کر کے ٹیبل پر تیسری پوزیشن اپنے نام کرلی۔

راولپنڈی کرکٹ اسٹیڈیم میں کھیلے گئے میچ میں کراچی کے کپتان عماد وسیم نے ٹاس جیت کر پشاور زلمی کو پہلے بیٹنگ کی دعوت دی تو زلمی کی ٹیم شدید مشکلات کا شکار ہوئی تاہم شعیب ملک نے ٹیم کو سنبھالا اور 151رنز تک پہنچایا۔

پشاور زلمی نے 8 وکٹوں کے نقصان پر 151 رنز بنائے، شعیب ملک نے سب سے زیادہ 68 رنز بنائے جبکہ کراچی کنگز کے محمد عامر نے 4 وکٹیں حاصل کیں۔

کراچی کنگز نے مطلوبہ ہدف 19ویں اوور میں 4 وکٹوں کے نقصان پر حاصل کرکے کامیابی سمیٹی، بابر اعظم نے ناقابل شکست 70 رنز بنائے۔

محمد عامر کو میچ کا بہترین کھلاڑی قرار دیا گیا۔