القاعدہ کے سربراہ الظواہری۔ —. فائل فوٹو

قاہرہ: القاعدہ کے سربراہ ایمن الظواہری نے اپنے ایک آڈیو پیغام میں جس کی ریکارڈنگ شدت پسند اسلامسٹ فورم پر پوسٹ کی گئی ہے، امریکا پر الزام عائدکیا ہے کہ وہ مصرکی فوج، سیکولر اور عیسائیوں کے ساتھ مل کر اسلامی صدر محمد مرسی کے خلاف سازش کررہا ہے۔

الظواہری کے بارے میں کہا جاتا ہے کہ وہ پاکستان یا افغانستان میں کہیں روپوش ہیں۔

تین جولائی کو مصر میں ہونے والی فوجی بغاوت پر اپنے پہلے عوامی تبصرے میں القائدہ کے سربراہ، جو خود بھی مصر کے باشندے ہیں، نے کہا کہ ”صلیبیوں، سیکولر افراد اور امریکا کی پیروی کرنے والی فوج نے مشترکہ طور پر گلف سے آنے والی رقم اور امریکی سازش کے ذریعے مصری صدر کو اقتدار سے محروم کیا۔

پندرہ منٹ کے ریکارڈڈ پیغام میں الظواہری نے مصر کے قبطی نسل کے عیسائی اقلیت پر یہ الزام بھی عائد کیا کہ اس نے اسلامی صدر کی معزولی کی حمایت کرکے مصرے کے جنوب میں ایک قبطی ریاست کے قیام کی راہ ہموار کی ہے۔

الظواہری نے نوبل انعام یافتہ اور اقوامِ متحدہ کے ایٹمی توانائی کے نگران ادارے کے سربراہ، نائب صدر محمد البرادی پر بھی زبانی حملے کیے جو مرسی کے ایک سالہ عہدۂ صدارت کے دوران حزب اختلاف کے رہنما تھے۔

الظواہری نے کہا کہ ”البرادی امریکی سامراجیت کے نمائندے ہیں، جب وہ بین الاقوامی ایٹمی توانائی کے ادارے کے سربراہ تھے، تو انہوں نے عراق کی تباہی میں اپنا کردار ادا کیا تھا۔“

مصرکے دہشت گرد اسلامی جہاد گروپ سے تعلق رکھنے والے الظواہری نے مرسی کی جماعت اخوان المسلمین پر بھی تنقید کی کہ اس نے اسلام کے سخت قوانین کے نفاذ میں نرمی سے کام لیا تھا۔

انہوں نے کہا کہ ”مرسی کی اخوان المسلمین کی حکومت نے جہاں تک ہوسکا امریکا اور سیکولر لوگوں کو خوش کرنے کی کوشش کی، لیکن وہ ان سے مطمئن نہ ہوسکے۔“

انہوں نے کہا کہ ”اُنہیں مرسی کی حکومت پر اعتماد نہیں تھا، اس لیے کہ وہ اخوان المسلمین کے اس نعرے: ’جہاد ہماری جنگ اور موت ہماری اولین خواہش ہے جو ہمیں خدا کے راستے پر لے جاتی ہے۔‘ کو کبھی بھلا نہیں سکے تھے۔“

انہوں نے کہا کہ ”اخوان المسلمین نے اس نعرے کو ترک کردیا اور اس نعرے کو اپنا لیا کہ ’اسلام ہی واحد حل ہے‘ لیکن صلیبیوں اور سیکولروں نے اس کو نہیں بھلایا تھا۔“

انہوں نے بغاوت پر تبصرہ کرتے ہوئے کہا کہ ”جمہوری طریقے سے اسلامی حکومت کو حاصل کرنے میں ناکامی کا اب اس سے بڑا کیا ثبوت ہوگا ؟“

انہوں نے کہا”میں زور دوں گا کہ وہ اسلامی شریعت کے نفاذ کے لیے متحد ہوجائیں ۔“