حکومت کا پبلک ٹرانسپورٹ کو الیکٹرک گاڑیوں میں تبدیل کرنے کا منصوبہ

اپ ڈیٹ 27 اکتوبر 2020
وفاقی وزیر کے مطابق پاکستان میں آئندہ 2 ،3  برس میں موٹروے کا تمام نیٹ ورک الیکٹرک گاڑیوں کی چارجنگ پر منتقل ہوجائے گا — فائل فوٹو:رائٹرز
وفاقی وزیر کے مطابق پاکستان میں آئندہ 2 ،3 برس میں موٹروے کا تمام نیٹ ورک الیکٹرک گاڑیوں کی چارجنگ پر منتقل ہوجائے گا — فائل فوٹو:رائٹرز

اسلام آباد: وفاقی وزیر سائنس اینڈ ٹیکنالوجی فواد چوہدری نے کہا ہے کہ پاکستان تحریک انصاف (پی ٹی آئی) کی حکومت میٹرو پولیٹن شہروں میں پبلک ٹرانسپورٹ کو الیکٹرک گاڑیوں میں تبدیل کرنے کے منصوبے پر کام کررہی ہے۔

ڈان اخبار کی رپورٹ کے مطابق فواد چوہدری نے برطانوی کمپنی ای جی وی کے ساتھ مقامی طور پر الیکٹرک بسوں کی تعمیر کے حوالے سے مفاہمت کی یاد داشت پر دستخط کرنے کی تقریب سے خطاب کرتے ہوئے کہا کہ اسلام آباد میں بجلی سے چلنے والی گاڑیوں کا چارجنگ اسٹیشن متعارف کرانے کے بعد حکومت پورے ملک میں موٹروے پر الیکٹرک گاڑیوں کے چارجنگ اسٹیشن لگانے کا فیصلہ کرچکی ہے۔

یہ بھی پڑھیں: وفاقی حکومت کراچی میں الیکٹرک بسیں چلانے کی خواہاں

فواد چوہدری کا مزید کہنا تھا کہ ای جی وی جو یورپ کی سب سے بڑی الیکٹرک بسیں بنانے والی کمپنی ہے، وہ پاکستان میں بھی الیکٹرک گاڑیوں کی اسمبلنگ کرے گی۔

انہوں نے کہا کہ یہ الیکٹرک بسوں کو بنانے کے حوالے سے حکومت کا غیر ملکی کمپنی کے ساتھ ہونے والا دوسرا معاہدہ ہے۔

وفاقی وزیر کا کہنا تھا کہ پہلے مرحلے میں لاہور میں الیکٹرک بسیں چلائی جائیں گی، جس کے بعد کراچی اور اسلام آباد میں چلائی جائیں گی، ان کا کہنا تھا کہ آئندہ 10 برسوں میں 40 فیصد پبلک ٹرانسپورٹ الیکٹرک پر منتقل ہوجائے گی۔

مزید پڑھیں: پاکستان نے پہلی مکمل برقی گاڑی متعارف کرادی

اس موقع پر انہوں نے سابق وزیراعلیٰ پنجاب شہباز شریف کی جانب سے شروع کردہ اورنج لائن میٹرو ٹرین منصوبے پر تنقید کرتے ہوئے کہا کہ پاکستان مسلم لیگ (ن) کی حکومت نے 60 ارب روپے خرچ کیے جبکہ موجودہ حکومت کو اس منصوبے کے لیے 12 ارب روپے کی سالانہ سبسڈی دینا ہوگی۔

ان کا مزید کہنا تھا کہ آئندہ 2، 3 برسوں کے دوران موٹروے کا تمام نیٹ ورک الیکٹرک گاڑیوں کی چارجنگ پر منتقل ہوجائے گا۔

واضح رہے کہ فواد چوہدری نے گزشتہ ماہ اعلان کیا تھا کہ رواں سال سے بیٹری سے چلنے والی الیکٹرک بسیں چلائی جائیں گی۔

علاوہ ازیں پاکستان میں الیکٹرک گاڑیوں کی ویلیو چین بنانے کے لیے ڈائیوو پاکستان ایکسپریس بس سروس لمیٹڈ اور (چینی کمپنی) اسکائی ویل آٹوموبائل نے اسٹریٹجک الائنس معاہدے پر دستخط کیے۔


یہ خبر 27 اکتوبر 2020 کو ڈان اخبار میں شائع ہوئی۔

تبصرے (0) بند ہیں