ارجنٹینا کے فٹ بال لیجنڈ میراڈونا چل بسے

اپ ڈیٹ 26 نومبر 2020

ای میل

میراڈونا نے ارجنٹینا کو عالمی چمپیئن بنوایا تھا —فائل/فوٹو: اے ایف پی
میراڈونا نے ارجنٹینا کو عالمی چمپیئن بنوایا تھا —فائل/فوٹو: اے ایف پی

ارجنٹینا سے تعلق رکھنے والے فٹ بال کی تاریخ کے عظیم کھلاڑی ڈیاگو میراڈونا 60 برس کی عمر میں انتقال کرگئے۔

خبر ایجنسی 'اے ایف پی' کی رپورٹ کے مطابق میراڈونا کے ترجمان کا کہنا تھا کہ عظیم فٹ بالر 60 برس کی عمر میں چل بسے۔

رپورٹ کے مطابق ان کے ملازمین میں شامل ایک رکن کا کہنا تھا کہ میراڈونا کا انتقال دل کا دورہ پڑنے سے ہوا جبکہ رواں ماہ کے اوائل میں ان کی برین سرجری بھی ہوئی تھی۔

یہ بھی پڑھیں: میراڈونا جونیئر والد کے نقش قدم پر

ارجنٹینا کے میڈیا اور مقامی کلب کے سابق کھلاڑی کا کہنا تھا کہ میراڈونا بیونس آئرس کے مضافات میں اپنے گھر میں موجود تھے جہاں انہیں دل کا دورہ پڑا۔

ارجنٹینا کے صدر البرٹو فرنانڈیز نے میراڈونا کے انتقال پر ملک میں تین روزہ قومی سوگ کا اعلان کر دیا ہے۔

برازیل کے عظیم کھلاڑی پیلے نے بھی میراڈونا کے انتقال پر دکھ کا اظہار کیا۔

خبر ایجنسی 'رائٹرز' کے نمائندے کو اپنے مختصر بیان میں انہوں نے کہا کہ ‘ایک دن میں اور وہ ایک ساتھ مل کر ایک گیند کو کِک ماریں گے’۔

خیال رہے کہ میراڈونا کو برازیل کے پیلے کے ساتھ فٹ بال کی تاریخ کے عظیم ترین کھلاڑیوں میں شمار کیا جاتا ہے۔

میرا ڈونا نے اپنی قیادت میں ارجنٹینا کو 1986 میں ورلڈ کپ دلا کر اپنی ٹیم کو عالمی چمپیئن بنایا تھا۔