الیکشن کمیشن عوام کو جوابدہ ہے، بلاول بھٹو

اپ ڈیٹ 19 جنوری 2021

ای میل

بلاول بھٹو عمر کوٹ میں ایک تقریب سے خطاب کررہے تھے — تصویر: ڈان نیوز
بلاول بھٹو عمر کوٹ میں ایک تقریب سے خطاب کررہے تھے — تصویر: ڈان نیوز

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ آج پاکستان کی ساری جمہوری قوتیں عوام کا سوال لے کر الیکشن کمیشن آف پاکستان (ای سی پی) کے سامنے کھڑی ہیں، کمیشن کو اس عوام کو جواب دینا پڑے گا۔

بلاول بھٹو نے عمر کوٹ میں ضمنی انتخاب میں پیپلز پارٹی کی کامیابی کی خوشی میں منعقدہ ایک تقریب سے خطاب کرتے ہوئے وزیراعظم کی جانب اشارہ کرتے ہوئے کہا کہ 'یہ نہ صرف سلیکٹڈ ہے بلکہ اسپانسرڈ بھی ہے'۔

انہوں نے مزید کہا کہ یہ 'جوکر کرپشن کا شور کرتا تھا، جگہ جگہ جا کر کرپٹ کرپٹ کا رونا روتا تھا، خود ہی کرپٹ نکلا، پوری کی پوری جماعت کرپٹ نکلی'۔

یہ بھی پڑھیں: پی ڈی ایم کا الیکشن کمیشن کے باہر احتجاج، کارکنوں کے قافلے اسلام آباد پہنچ گئے

بات کو جاری رکھتے ہوئے انہوں نے مزید کہا کہ آج تک وہ جواب نہیں دے سکے کہ امریکا میں سلائی مشین بیچتے بیچتے عمران خان کی بہن کو وہ مراعات کس طرح ملیں، آج تک جواب نہیں دے سکے کہ خیبرپختونخوا میں پورے ملک کی سب سے مہنگی بس چل رہی ہے جس میں کبھی آگ لگ جاتی ہے، کبھی عوام دھکا دے کر چلاتی ہے لیکن کوئی اس کرپشن کا حساب نہیں دیتا۔

انہوں نے کہا کہ آج پی ڈی ایم الیکشن کمیشن کے سامنے احتجاج کررہی ہے، شہید بینظیر بھٹو کو سیکیورٹی رسک قرار دیا گیا ہماری حکومتوں کو ختم کردیا گیا اور جنہیں انہوں نے حکومت دلوادی ہے یہ لوگ تو فارن فنڈنگ سے آئے ہیں، انہیں بھارت اور اسرائیل سے فنڈنگ ہوئی ہے۔

بلاول بھٹو کا کہنا تھا کہ ہر پاکستانی سوال کررہا ہے کہ الیکشن کمیشن 2014 سے لے کر آج تک یہ کیوں نہیں بتا سکا کہ پی ٹی آئی کو فارن فنڈنگ کیوں ہورہی ہے، اسرائیل اور بھارت کے کون شہری ہیں جو عمران خان کو پیسے دیتے رہے۔

مزید پڑھیں: پی ڈی ایم کے حکومت سے مذاکرات نہیں ہورہے، بلاول بھٹو زرداری

ان کا کہنا تھا کہ جب عوام کے ووٹوں سے حکومت بنتی ہے تو وہ عوام مسائل بھی حل کرتی ہے لیکن جو کسی کے اشارے پر حکومت بناتے ہیں وہ ان کی جانب ہی دیکھتی رہتے ہیں اور عوام کو بھول جاتے ہیں۔

ضمنی انتخاب میں کامیابی پر انہوں نے کہا کہ عوام دشمن، جمہور دشمن، غریب دشمن طاقت کو جواب دے دیا ہے، انہوں نے کہا کہ عوام نے ان 'پیروں' کو جواب دے دیا ہے جو ٹھیکے پر اسٹیبلشمنٹ کے لیے کام کرتے ہیں۔

چیئرمین پی پی پی کا کہنا تھا کہ عوام نے ان سیاسی یتیموں کے ٹولے، جو کل مشرف کے ساتھ کھڑے تھے اور آج عمران خان کے ساٹھ کھڑے ہیں، انہیں دوسری مرتبہ بھگا دیا ہے، اب تھر میں بھی قومی اسمبلی کا انتخاب آرہا ہے اور وہاں سے بھی انہیں بھگانا ہے۔

چیئرمین پی پی پی نے کہا کہ مہنگائی کی سونامی میں ہمارے مزدور اور کسان مر رہے ہیں، اگر اس حکومت کو ہم گھر نہیں بھیجیں گے تو عوام کے ساتھ ہونے والے ظلم کو کون روکے گا۔

یہ بھی پڑھیں: اب یہ کھلواڑ، سلیکٹڈ اور سلیکشن کا کاروبار بند ہوگا، بلاول بھٹو

انہوں نے مزید کہا کہ آج تک پاکستان کے عوام کو آٹا چوری اور چینی چوری کی کرپشن کا کوئی جواب نہیں ملا، ہم انصاف مانگتے ہیں اور مطالبہ کرتے ہیں کہ 'اس کٹھ پتلی کو استعفیٰ دینا پڑے گا ورنہ عمر کوٹ کے عوام اسلام آباد پہنچ کر اس سے استعفیٰ چھین لیں گے'۔

ان کا کہنا تھا کہ عوام نے اس ملک کی معاشی، انسانی حقوق کی جدوجہد کے لیے ہمیشہ جدو جہد کی ہے اور اب آپ کو پی ڈی ایم کا ساتھ دینا پڑے گا، عمر کوٹ سے سلیکٹڈ کو بھگا دیا ہے اور اب پورے ملک سے بھگانا پڑے گا۔

بلاول نے کہا کہ آپ کے ووٹوں کو چھین کا اسے وزیراعظم بنا گیا ہے جو نااہل اور نالائق وزیراعظم ہے اور دو سال کے عرصے میں عوام کا جینا حرام کردیا ہے۔