مریم نواز کی بڑی بیٹی حادثے میں زخمی، حالت خطرے سے باہر
سابق وزیر اعظم نواز شریف کی بیٹی اور پاکستان مسلم لیگ (ن) کی نائب صدر مریم نواز کی بڑی بیٹی ایک حادثے میں زخمی ہوگئیں تاہم ان کی حالت خطرے سے باہر ہے۔
پاکستان مسلم لیگ (ن) کی جانب سے سماجی رابطے کی ویب سائٹ فیس بک پر جاری بیان میں کہا گیا ہے کہ 'مریم نوازشریف کی بڑی بیٹی حادثے میں زخمی ہوگئیں'۔
ترجمان مسلم لیگ (ن) مریم اورنگ زیب نے کہا کہ مریم نواز کی بیٹی 'مہرالنسا آئی سی یو میں روبہ صحت ہیں، سر پرشدید چوٹ آنے پر انہیں ہسپتال منتقل کیا گیا تھا جہاں ان کی سرجری ہوئی'۔
مریم اورنگ زیب کا کہنا تھا کہ 'مہرالنسا اس وقت آئی سی یو میں ہیں اور الحمداللہ اب وہ خطرے سے باہر ہیں'۔
ان کا کہنا تھا کہ 'بیٹی کے آئی سی یو میں ہونے کی وجہ سے مریم نوازشریف کی حیدرآباد روانگی منسوخ کردی گئی ہے'۔
انہوں نے اپنے بیان میں کہا کہ 'اپیل ہے کہ مہرالنسا کی جلد صحت یابی کے لیے دعا فرمائیں'۔
لائیو ٹی وی