تنقید کے بعد تعریفیں بٹورنے والے ’گروو میرا‘ کا ریکارڈ

اپ ڈیٹ 19 فروری 2021
گانے کو 19 فروری تک ایک کروڑ سے زائد بار دیکھا گیا تھا—اسکرین شاٹ
گانے کو 19 فروری تک ایک کروڑ سے زائد بار دیکھا گیا تھا—اسکرین شاٹ

رواں ماہ 20 فروری سے شروع ہونے والے پاکستان سپر لیگ (پی ایس ایل) کے چھٹے سیزن کے آفیشل گانے نے محض 12 دن میں نیا ریکارڈ بنا کر پی ایس ایل کے تمام گانوں کو پیچھے چھوڑ دیا۔

نصیبو لال، آئمہ بیگ اور ہپ ہاپ بینڈ ینگ اسٹنرز (Young Stunners) کی آواز میں ’گروو میرا‘ کو رواں ماہ 6 فروری کو ریلیز کیا گیا تھا۔

گانے کے ریلیز ہوتے ہی اس پر خوب تنقید کی گئی تھی اور کئی افراد نے گانے میں نصیبو لال کی آواز پر برہمی کا اظہار کیا تھا تاہم ایک ہفتے بعد گانے کی تعریفیں کی جانے لگیں۔

گانے پر زیادہ تر تنقید کرنے والے کرکٹ اور موسیقی کے شائقین تھے تاہم جب شوبز و موسیقی سے وابستہ شخصیات نے گانے کی تعریفیں کرنا شروع کیں تو باقی افراد نے بھی گانے کو سراہنا شروع کیا۔

تنقید کے بعد تعریفیں بٹورنے والے ’گروو میرا‘ کو محض 12 دن میں یوٹیوب پر ایک کروڑ سے زائد بار دیکھا جا چکا ہے اور یہ اعزاز حاصل کرنے والا ’گروو میرا‘ پی ایس ایل کا پہلا گانا بن گیا۔

’گروو میرا‘ سے قبل پی ایس ایل فور کے 2019 میں اداکار و گلوکار فواد خان کی آاز میں ریلیز کیے گانے ’کھیل دیوانوں کا‘ کو اب تک ایک کروڑ 40 ہزار سے زائد بار دیکھا جا چکا ہے۔

یہ بھی پڑھیں: پی ایس ایل 6: کا آفیشل گیت ’گروو میرا‘ریلیز

تاہم ’کھیل دیوانوں کا‘ کو ریلیز ہوئے دو سال ہوچکے ہیں جب کہ ’گروو میرا‘ کو محض 12 دن ہوئے ہیں اور اس کے ویوز کی تعداد ایک کروڑ 5 ہزار کے قریب پہنچ چکی ہے۔

جو اعزاز ’کھیل دیوانوں کا‘ نے ڈیڑھ سال سے زائد عرصے میں حاصل کیا ’گروو میرا‘ نے وہ اعزاز محض 12 دن میں حاصل کرلیا۔

دلچسپ بات یہ ہے کہ ’گروو میرا' کی طرح ’کھیل دیوانوں کا‘ کو بھی تنقید کا نشانہ بنایا گیا تھا مگر حیران کن طور پر اسے بھی سب سے زیادہ دیکھا گیا۔

’گروو میرا‘ ریلیز ہوا تو کئی شائقین نے علی ظفر کے پی ایس ایل کے لیے گائے گئے ابتدائی تینوں گانوں کو سب سے بہترین گانے قرار دیا تاہم ان کے گانوں کو اتنے کم عرصے میں اتنی زیادہ مقبولیت نہیں ملی تھی۔

خیال کیا جا رہا ہے کہ پی ایس ایل کے اختتام سے قبل ہی ’گروو میرا‘ کو ڈیڑھ کروڑ بار تک دیکھ لیا جائے گا تاہم اس حوالے سے کچھ بھی کہنا قبل از وقت ہے۔

پی ایس ایل کے لیے پہلا گانا 2015 میں ’اب کھیل کے دکھا‘ علی ظفر کی آواز میں ریلیز کیا گیا تھا، دوسرا گانا ’اب کھیل جمے گا‘ اور تیسرا گانا ’دل سے جان لگا دے‘ بھی ان کی آواز میں ریلیز کیا گیا تھا۔

چوتھا گانا ’کھیل دیوانوں کا‘ 2019 میں اداکار فواد خان نے گایا تھا، پی ایس ایل فائیو کے لیے ’تیار ہیں‘ کو گلوکار علی عظمت، عارف لوہار، عاصم اظہر، ذوالفقار جبار خان اور ہارون رشید کی آواز میں ریلیز کیا گیا تھا۔

پی ایس ایل کے چھٹے سیزن کے لیے 6 فروری 2021 کو ’گروو میرا‘ ریلیز کیا گیا، جس نے محض 12 دن میں اعزاز اپنے نام کیا۔

ضرور پڑھیں

تبصرے (0) بند ہیں