سجل علی اور عاطف اسلم کے گانے ’رفتہ رفتہ‘ کا ٹیزر ریلیز

16 جولائ 2021
عاطف اسلم اور سجل علی کی یہ میوزک ویڈیو 21 جولائی کو ریلیز کی جائے گی—فوٹو: اسکرین شاٹ
عاطف اسلم اور سجل علی کی یہ میوزک ویڈیو 21 جولائی کو ریلیز کی جائے گی—فوٹو: اسکرین شاٹ

پاکستان کے نامور گلوکار عاطف اسلم اور معروف اداکارہ سجل علی کے آنے والے رومانوی گانے ’رفتہ رفتہ’ کا ٹیزر ریلیز کردیا گیا۔

ٹیزر میں عاطف اسلم اور سجل کو ایک کشتی میں سوار دیکھا جاسکتا ہے اور اس سین کے پس منظر میں بانسری پر ایک مدھر دھن بجتی سنائی دے رہی ہے۔

اسی ٹیزر میں پھر صحرائی علاقے میں عاطف اسلم اور سجل علی کو دکھایا گیا ہے جس میں عاطف اسلم نے بلیک سوٹ جبکہ سجل نے سرخ رنگ کا گاؤن زیب تن کیا ہے۔

عاطف اسلم اور سجل علی کی یہ میوزک ویڈیو 21 جولائی کو ریلیز کی جائے گی۔

مزید پڑھیں: عاطف اسلم اور سجل علی کی ایک ساتھ کام کرنے کی تصدیق

اس سے قبل عاطف اسلم نے اپنے سوشل میڈیا اکاؤنٹس پر شیئر کی گئی پوسٹ میں گانے کا ٹیزر ریلیز کرنے کا اعلان کیا تھا۔

اس سے قبل عاطف اسلم نے 9 جولائی کو اپنی انسٹاگرام پوسٹ میں سجل علی کے ساتھ آنے والے گانے کی پہلی جھلک جاری کرتے ہوئے تصدیق کی کہ جلد ہی دونوں اسکرین پر دکھائی دیں گے۔

’رفتہ رفتہ‘ کے عنوان سے بنائے جانے والے گانے کی شاعری راج رنجھود نے لکھی ہے جب کہ اس کی موسیقی بھی انہوں نے ہی ترتیب دی ہے۔

ہدایت کار حسن بلوچ کے گانے کو ترن چوہدری نے پروڈیوس کیا ہے اور گانے میں سجل علی پہلی بار عاطف اسلم کے ساتھ جلوے بکھیرتی دکھائی دیں گی۔

یہ بھی پڑھیں: کیا سجل علی، عاطف اسلم کی میوزک ویڈیو کا حصہ بننے جارہی ہیں؟

سجل علی سے قبل حال ہی میں عاطف اسلم پہلی بار سائرہ یوسف کے ساتھ بھی فروری میں ’رات‘ ریلیز کیا تھا، جس میں دونوں کے انداز کو سراہا گیا تھا۔

اسی طرح گزشتہ ماہ جون کے اختتام پر عاطف اسلم کا ’دل جلانے کی بات‘ بھی ریلیز ہوا تھا، جس میں وہ راقیل والڈیز کے ساتھ دکھائی دیے تھے۔

’دل جلانے کی بات‘ دراصل ملکہ ترنم نورجہاں کے ماضی کے مقبول گانے ’آشیانے کی بات‘ کا نیا ورژن تھا۔

علاوہ ازیں عاطف اسلم نے رواں برس اپریل میں ماہ رمضان المبارک میں کلام 'مصطفیٰ جان رحمت' بھی ریلیز کیا تھا۔ اس سے قبل مئی 2020 میں انہوں نے کورونا کی وبا کے دوران اسما الحسنیٰ جاری کی تھی، ان کی اسما الحسنیٰ کی ویڈیو کوک اسٹوڈیو 2020 کا حصہ تھی۔

تبصرے (0) بند ہیں