رئیل می کی میگ ڈارٹ میگنیٹک وائرلیس چارجنگ ڈیوائسز متعارف

اپ ڈیٹ 04 اگست 2021
— فوٹو بشکریہ رئیل می
— فوٹو بشکریہ رئیل می

ایپل نے آئی فون 12 کے ساتھ وائرلیس چارجنگ کا نیا میگ سیف سسٹم متعارف کرایا تھا اور اب پہلی بار رئیل می نے اینڈرائیڈ فونز کے لیے یہ ٹیکنالوجی پیش کی ہے۔

رئیل می کی جانب سے میگنیٹک وائرلیس چارجنگ سسٹم کو اینڈرائیڈ فونز کے لیے مختلف پراڈکٹس کی شکل میں متعارف کرایا ہے۔

رئیل می نے اس ٹیکنالوجی کو میگ ڈارٹ کا نام دیا ہے جو ایپل کے میگ سیف سسٹم کے مقابلے میں زیادہ تیز رفتار چارجنگ اسپیڈ فراہم کرتی ہے۔

اس ٹیکنالوجی پر مبنی بہترین ڈیوائس 50 واٹ میگ ڈارٹ چارجر ہے جسے رئیل می نے دنیا کا تیز ترین میگنیٹک وائرلیس چارجر قرار دیا ہے۔

فوٹو بشکریہ رئیل می
فوٹو بشکریہ رئیل می

رئیل می کا دعویٰ ہے کہ میگ ڈارٹ چارجر کو کمپنی کے 65 واٹ سپر ڈارٹ وائرڈ چارجر سے پلگ ان کیا جاتا ہے تو یہ 4500 ایم اے ایچ بیٹری کو 54 منٹ میں سو فیصد تک چارج کردیتا ہے۔

یہ وائرلیس چارجر لگ بھگ رئیل می کے 50 واٹ وائرڈ چارجر جتنا تیز رفتار ہے۔

رئیل می نے ایک اور 15 واٹ میگ ڈارٹ چارجر بھی متعارف کرایا ہے جو ایپل کے میگ سیف کی طرح نظر آتا ہے مگر کمپنی کے مطابق یہ 26.4 فیصد زیادہ پتلا اور زیادہ تیز چارجنگ اسپیڈ فراہم کرتا ہے۔

یہ 4500 ایم اے ایچ بیٹری کو 90 منٹ میں مکمل چارج کرنے کی صلاحیت رکھتا ہے جو ایپل کے 15 واٹ میگ سیف چارجر سے کافی زیادہ تیز ہے۔

اسی طرح ایک 2 ان 1 میگ ڈارٹ پاور بینک ہے جو ایپل کے میگ سیف بیٹری پیک سے ملتا جلتا ہے، جس کو فون اسٹینڈ کے طور پر بھی استعمال کیا جا سکتا ہے۔

فوٹو بشکریہ رئیل می
فوٹو بشکریہ رئیل می

ایک میگ ڈارٹ کیس ہے جو رئیل می کے نئے جی ٹی فلیگ شپ فون کے لیے متعارف کرایا گیا ہے جس میں یو ایس بی سی پورٹ اور ہیڈ فون جیک کی جگہ کے ساتھ میگ ڈارٹ کنکٹویٹی بلٹ ان ہے۔

فوٹو بشکریہ رئیل می
فوٹو بشکریہ رئیل می

میگ ڈارٹ والٹ بھی ایپل کے میگ سیف والٹ سے ملتا جلتا ہے مگر اس میں ایک کک اسٹینڈ بھی ہے۔

مگر سب سے بہتر میگ ڈارٹ بیوٹی لائٹ نامی ایسیسری ہے جو سیلفیز کے لیے فلپ اپ رنگ لائٹ ہے جو ریورس وائرلیس چارجنگ کی سہولت فراہم کرتا ہے۔

فوٹو بشکریہ رئیل می
فوٹو بشکریہ رئیل می

رئیل می کی جانب سے ان کی دستیابی یا قیمتوں کے حوالے سے فی الحال کوئی اعلان نہیں کیا گیا ۔

ضرور پڑھیں

تبصرے (0) بند ہیں