عمران عباس ’پری زاد’ میں احمد علی اکبر کی اداکاری کے معترف

اپ ڈیٹ 13 اکتوبر 2021
پری زاد’ ڈراما معروف رائٹر ہاشم ندیم کے اسی نام سے لکھے گئے ناول پر مبنی ہے—فوٹوز: انسٹاگرام
پری زاد’ ڈراما معروف رائٹر ہاشم ندیم کے اسی نام سے لکھے گئے ناول پر مبنی ہے—فوٹوز: انسٹاگرام

پاکستان کے معروف اداکار عمران عباس نے نجی چینل سے نشر ہونے والے ڈرامے ’پری زاد’ میں احمد علی اکبر کی پرفارمنس کو سراہتے ہوئے کہا ہے کہ وہ ان سے متاثر ہوئے ہیں۔

اداکار عمران عباس نے اپنی سوشل میڈیا پوسٹ میں کہا کہ ’پری زاد یقیناً بہترین ڈراما سیریل ہے جو میں نے حالیہ دنوں میں دیکھا’۔

انہوں نے کہا کہ ’غیر روایتی، مضبوط اسکرپٹ، بہترین ڈائریکشن، ہر ایک کی ناقابل یقین اداکاری، خاص طور پر احمد علی اور شاندار پروڈکشن بھی ہے’۔

عمران عباس نے کہا کہ ’یہ ڈراما بہت سے لوگوں کے لیے سیکھنے کا موقع ہے کہ وہ نئی کہانیوں کا تجربہ کریں اور خطرات مول لیں’۔

—اسکرین شاٹ
—اسکرین شاٹ

عمران عباس کی پوسٹ کو انسٹاگرام اسٹوری میں شیئر کرتے ہوئے اداکار احمد علی اکبر نے ان کا شکریہ ادا کرتے ہوئے لکھا کہ ‘مجھے بہت خوشی ہے کہ آپ اس سے لطف اندوز ہو رہے ہیں’۔

خیال رہے کہ ’پری زاد’ ڈراما معروف رائٹر ہاشم ندیم کے اسی نام سے لکھے گئے ناول پر مبنی ہے۔

ہاشم ندیم کا یہ ناول اقساط کی صورت میں شائع ہوا تھا جسے بعد ازاں کتاب کی شکل بھی دی گئی۔

اس کی کہانی معاشرے میں اپنی رنگت کی نظر انداز کیے جانے والے انسان کی جدوجہد پر مبنی ہے جو خود کو ثابت کرنے کی کوشش کرتا ہے۔

ڈرامے کا مرکزی کردار ادا کرنے والے احمد علی اکبر کو ان دنوں اپنی اداکاری کی وجہ سے بہت پذیرائی مل رہی ہے۔

—اسکرین شاٹ
—اسکرین شاٹ

’پری زاد‘ کی کاسٹ میں یمنیٰ زیدی، اشنا شاہ، عروہ حسین، صبور علی اور نعمان اعجاز بھی شامل ہیں، اس ڈرامے کی اب تک 12 اقساط نشر ہو چکی ہیں۔

خیال رہے کہ ڈرامے کی ابتدائی اقساط میں ’پری زاد‘ میں میک اپ سے احمد علی اکبر کی رنگت تبدیل کرنے پر سوشل میڈیا پر تنقید بھی کی گئی تھی بعدازاں ڈراما آگے بڑھنے کے بعد اسے بے حد پسند کیا جارہا ہے۔

ضرور پڑھیں

تبصرے (0) بند ہیں