جنہیں لگتا ہے ہم اداکار فحاشی پھیلاتے ہیں، انہیں ڈرامے نہیں دیکھنے چاہئیں، اُشنا شاہ
پاکستانی اداکارہ اُشنا شاہ نے سوشل میڈیا پر انہیں تنقید کا نشانہ بنانے والے صارفین کو آڑے ہاتھوں لیتے ہوئے کہا ہے کہ اداکاروں اور اداکاری کو کمتر سمجھنے والوں کو ٹی وی سے دور رہنا چاہیے۔
اشنا شاہ کو اس وقت نجی ٹی وی پر نشر ہونے والے ڈرامے ’پری زاد‘ میں ان کے کردار ناہید پر چند ٹوئٹر صارفین نے تنقید کا نشانہ بنایا جس پر اداکارہ نے انہیں ٹی وی نہ دیکھنے کا مشورہ دیا۔
مزید پڑھیں: اشنا شاہ کے آنے والے گانے کی تصاویر پر مداح برہم
ڈراما بشر مومن سے مشہور ہونے والی اداکارہ کا ماننا ہے کہ جو لوگ بھی اداکاری کو بطور پیشہ کمتر سمجھتے ہیں یا جو یہ سمجھتے ہیں اداکار ’فحاشی‘ کو فروغ دیتے ہیں تو انہیں ڈرامے نہیں دیکھنے چاہئیں اور سوشل میڈیا سے بھی دور رہنا چاہیے۔
31 سالہ اداکار نے سماجی رابطوں کی ویب سائٹ ٹوئٹر پر اپنے پیغام میں کہا کہ اخلاقیات کے حامل وہ تمام پاکستانی جو اداکاری اور اداکاروں کو کمتر سمجھتے ہیں اور جو یہ سمجھتے ہیں کہ ہم فحاشی پھیلاتے ہیں، انہیں فوری طور پر اپنے ٹی وی یا ایسے ذرائع سے چھٹکارا حاصل کرنا چاہیے جو ان کے خیال میں اسلامی تعلیمات کے خلاف ہے اور فوری طور پر سوشل میڈیا سے بھی دوری اختیار کرنی چاہیے۔
انہوں نے ہمیشہ دوسروں کو سبق سکھانے کے لیے تیار رہنے والے افراد کو پیغام دیتے ہوئے کہا کہ وہ دوسروں پر تبصرہ کرتے ہوئے احترام کا دامن ہاتھ سے نہ چھوڑیں اور کچھ غیرت کا مظاہرہ کریں۔
اس تبصرے پر اشنا شاہ کو ملے جلے ردعمل کا سامنا کرنا پڑا اور ٹوئٹر صارفین نے ان کے موقف کو درست قرار دیتے ہوئے انہیں متوازن سوچ اپنانے کا مشورہ دیا۔
یہ بھی پڑھیں: بلال عباس اور اُشنا شاہ کا منفرد ڈرامہ ‘بلا’
ایک ٹوئٹر صارف نے ان کے رویے پر مایوسی کا اظہار کرتے ہوئے کہا کہ آپ ایک اور انتہا پر چلی گئیں، بدقسمتی سے ہمارے معاشرے میں متوازن، اعتدال پسند اور معقول نکتہ نظر رکھنے والے لوگ نہیں ہیں۔
ایک اور صارف نے لکھا کہ یہ مذہبی یا اخلاقی اقدار کا نہیں بلکہ ٹی وی پر غیرمعیاری مواد کی بات ہے، مسئلہ یہ ہے کہ انڈسٹری میں کوئی بھی سماجی ذمے داری لینے پر تیار نہیں ہے۔
کنزیٰ طاہر نے اداکارہ کو سراہتے ہوئے کہا کہ اداکاری یا اداکار کسی سے کم نہیں، وہ بہت محنت اور لگن سے کام کرتے ہیں اور ان کا اس پیشے میں کام کرنا بہت مشکل ہے۔
فیصل نامی صارف نے اشنا کے ڈرامے پری زاد کو پسندیدگی کی سند دیتے ہوئے مشورہ دیا کہ وہ اپنے کام پر توجہ دیں اور منفی چیزیں پھیلانے والوں کو نظرانداز کریں۔
واضح رہے کہ رواں سال ستمبر میں اداکارہ اشنا شاہ کو ان کے ریلیز ہونے والے گانے کی شوٹنگ کے دوران کھنچوائی گئی تصاویر سوشل میڈیا پر شیئر کرنے پر سخت تنقید کا سامنا کرنا پڑا تھا۔
مزید پڑھیں: رمضان ٹرانسمیشن کرنے والے اداکاروں پر اُشنا شاہ کی تنقید
اس سے قبل ماضی میں بھی اشنا شاہ کے انداز، بولڈ تصاویر اور ویڈیوز کی وجہ سے ان پر تنقید کی جاتی رہی تھی۔
تبصرے (2) بند ہیں