’رومیو ویڈز ہیر‘ اور ’میرا سسرال‘ جیسے ڈراموں میں اداکاری کرنے والی اداکارہ مریم انصاری نے اپنی شادی کی تقریبات کی ویڈیو شیئر کردی۔

مریم انصاری کی شادی کی تقریبات 20 دسمبر سے کراچی میں شروع ہوئی تھیں اور ان کی مایوں کی تقریبات کی وائرل ہونے والی ویڈیوز میں اداکارہ کو سہیلیوں کے ہمراہ دیکھا گیا تھا۔

مایوں کی تقریبات کے بعد 20 اور 21 دسمبر کی درمیانی شب مریم انصاری اور اویس خان کی شادی کی تقریبات کے لیے قوالی کا اہتمام کیا گیا۔

قوالی کی محفل میں اداکار علی انصاری اور ان کی منگیتر صبور علی سمیت دیگر شوبز شخصیات نے شرکت کی۔ ان کی شادی کی تقریبات تاحال جاری ہیں اور ممکنہ طور پر کل تک وہ پیا گھر سدھار جائیں گی۔

مریم انصاری اور سابق قومی کرکٹر معین خان کے بیٹے اویس خان نے رواں برس فروری میں نکاح کرتے ہوئے جلد شادی کا عندیہ دیا تھا۔

نکاح کے بعد دونوں کو ایک ساتھ دیکھا گیا اور اپنی شادی کی تقریبات میں بھی انہیں مختلف گانوں پر ایک ساتھ ڈانس کرتے دیکھا گیا۔

دونوں کی شادی کی تقریبات میں متعدد شوبز و اسپورٹس شخصیات سمیت فیشن اور سیاست سے وابستہ افراد نے شرکت کی۔

شادی کی تقریبات کے آغاز کے دو دن بعد مریم انصاری نے 22 دسمبر کو اپنے مایوں کی تقریب کی ویڈیو شیئر کی جب کہ ان کی سہیلی اداکارہ صبور علی نے بھی ان کے مایوں کی تقریب کی تصاویر کو شیئر کیا۔

علاوہ ازیں مریم انصاری کا میک اپ کرنے والے بیوٹیشن اور تقریبات کی ویڈیو اور فوٹوگرافی کرنے والے ادارے کی جانب سے بھی ان کی شادی کی تقریبات کی ویڈیوز شیئر کی گئیں۔