مداح ملتے وقت میرے ہاتھ چوم کر آنکھوں پر رکھتے ہیں، نیلم منیر

اپ ڈیٹ 25 اپريل 2022
مداحوں کا پیار ہی میرے لیے ایوارڈ ہے، اداکارہ—اسکرین شاٹ
مداحوں کا پیار ہی میرے لیے ایوارڈ ہے، اداکارہ—اسکرین شاٹ

جلد ہی رومانٹک کامیڈی فلم ’چکر‘ میں جلوے بکھیرنے والی اداکارہ نیلم منیر نے کہا ہے کہ ان کے مداح ہی ان کے لیے ایوارڈز کی اہمیت رکھتے ہیں، کیوں کہ وہ جب ان سے ملتے ہیں تو عقیدت میں ان کے ہاتھ چوم کر آنکھوں پر رکھتے ہیں۔

نیلم منیر نے حال میں جرمن نشریاتی ادارے ’ڈوئچے ویلے‘ (ڈی ڈبلیو اردو) کو دیے گئے انٹرویو میں بتایا کہ وہ عید الفطر پر ریلیز ہونے والی فلم ’چکر‘ میں ڈبل کردار ادا کرتی دکھائی دیں گی۔

انہوں نے کہا کہ وہ کافی عرصے بعد بڑے پردے پر دکھائی دیں گی، اس لیے وہ ڈبل کردار ادا کر رہی ہیں۔

ان کے مطابق ’چکر‘ میں شامل آئٹم سانگ فلم کی کہانی کے مطابق ہے، وہ غیر ضروری شامل نہیں کیا گیا اور یہ کہ اس گانے میں ڈانس کرنے والی تمام خواتین ہی ہیں۔

ایک سوال کے جواب میں نیلم منیر نے بتایا کہ وہ گزشتہ دو سال سے رمضان المبارک میں کام سے چھٹیاں لیتی ہیں، تاکہ وہ گھر میں عبادت کرنے سمیت اہل خانہ کے ساتھ وقت بھی گزاریں۔

نیلم منیر نے خاندان کے حوالے سے بات کرتے ہوئے کہا کہ ان کے خاندان کی لڑکیوں کو سوشل میڈیا پر تصاویر لگانے کی اجازت تک نہیں۔

یہ بھی پڑھیں: نیلم منیر کی محبت بھی ‘رانگ نمبر’

اداکارہ نے بتایا کہ ان کا تعلق پختون خاندان سے ہے اور ان کی بہنیں بھی سوشل میڈیا پر اپنی تصاویر تک شیئر نہیں کرتیں مگر انہیں کسی طرح اجازت مل گئی تھی اور ایسے ہی وہ شوبز میں آگئیں۔

ایک سوال کےجواب میں انہوں نے بتایا کہ انہیں بچپن سے ہی اداکاری کا شوق تھا اور ہیروئن بننا چاہتی تھیں، اب مداح ہی بتا سکتے ہیں کہ وہ ہیروئن بن گئی ہیں یا نہیں؟

اداکارہ کا کہنا تھا کہ وہ ہمیشہ سے ہی منفرد کردار ادا کرنا چاہتی ہیں اور اگر انہیں کردار کے لیے بوڑھی عورت بننا پڑے یا پھر لڑکا بننا پڑے تو بھی وہ گریز نہیں کریں گی۔

ایوارڈز میں نامزدگیوں کے باوجود شوز میں شرکت نہ کرنے کے سوال پر نیلم منیر نے کہا کہ دراصل ان کے مداح ہی ان کے لیے ایوارڈ کی اہمیت رکھتے ہیں۔

مزید پڑھیں: نیلم منیر اور سمیع خان کی ’رانگ نمبر‘ میں ہونے والی محبت

انہوں نے کہا کہ خواتین ان کی بڑی مداح ہیں اور وہ جب بھی ان کے ساتھ ملتی ہیں تو عقیدت میں ان کے ہاتھ چوم پر آنکھوں پر رکھ دیتی ہیں۔

خیال رہے کہ عید الفطر پر ان کی ریلیز ہونے والی فلم ’چکر‘ میں ان کے ہمراہ احسن خان، یاسر نواز، شمعون عباسی اور دیگر اداکار ایکشن میں دکھائی دیں گے۔

نیلم منیر کی یاسر نواز کے ہمراہ یہ دوسری فلم ہے اور ان کی فلم کا عید الفطر پر دیگر چار رومانٹک کامیڈی مصالحہ فلموں سے مقابلہ ہوگا۔

تبصرے (0) بند ہیں