حنا الطاف کی سیلاب متاثرہ خواتین کے لیے سینیٹری پیڈز عطیہ کرنے کی اپیل

اپ ڈیٹ 29 اگست 2022
اداکارہ نے بچوں کے پیپمرز بھی عطیہ کرنے کی اپیل کی—فوٹو: انسٹاگرام
اداکارہ نے بچوں کے پیپمرز بھی عطیہ کرنے کی اپیل کی—فوٹو: انسٹاگرام

پاکستان بھر میں سیلاب کی تباہ کاریوں کے بعد فلاحی اداروں سمیت اہم شخصیات نے امدادی کارروائیاں شروع کردی ہیں اور اس ضمن میں متعدد شوبز شخصیات فنڈز جمع کرنے میں بھی مصروف ہیں۔

اداکارہ حنا الطاف نے بھی سیلاب متاثرین کے لیے عطیات جمع کرنا شروع کردیے ہیں اور ساتھ ہی انہوں نے عوام سے اپیل کی ہے وہ بڑھ چڑھ کر متاثرین کی مدد کے لیے آگے آئیں۔

اداکارہ نے انسٹاگرام پر مختصر ویڈیو شیئر کرتے ہوئے لوگوں کو تجویز دی کہ وہ غذا تیار کرنے والی چیزیں فراہم کرنے کے بجائے متثرین کے لیے تیار غذائیں دیں تو اچھا ہے، کیوں کہ سیلاب کی وجہ سے متاثرین غذاؤں کو تیار کرنے کے قابل بھی نہیں رہے۔

انہوں نے ویڈیو میں عوام سے اپیل کی وہ بڑھ چڑھ کر فلاحی تنظیموں کو عطیات جعم کروائیں، وہ یہ نہ سوچیں کہ ان کے پاس جمع کروانے کے لیے کچھ بھی نہیں، ان کی جانب سے دیا گیا محض 100 روپیہ بھی اس وقت بہت بڑا ہے۔

حنا الطاف نے ویڈیو میں مداحوں سے اپیل کرتے ہوئے مزید کہا کہ وہ فلاحی تنظیموں کو عطیات جمع کرواتے وقت خواتین کے استعمال میں آنے والی اشیا بھی ضرور دیں۔

انہوں نے عوام کو اپیل کی کہ وہ فلاحی تنظیموں کو خواتین کے لیے سینیٹری پیڈز اور بچوں کے لیے پیمپرز بھی عطیہ کریں، کیوں کہ سیلاب سے متاثرہ بچے انتہائی ناقص حالت میں زندگی گزارنے پر مجبور ہیں۔

اداکارہ نے مداحوں کو اپیل کی کہ اگر ان کے گھر میں پانی کی ایک خالی بوتل بھی اضافی ہے تو وہ بھی عطیہ کریں، کیوں کہ اس سے بھی بہت بڑا فرق پڑنے والا ہے۔

تبصرے (1) بند ہیں

عرفان Aug 30, 2022 11:17am
کچھ مد د کر رہے ہیں اور کچھ نمبر بڑھا رہے ہیں۔