سیلاب متاثرین کی مدد کے لیے ترکیہ سے پاکستان آنے والے ارطغرل غازی کے اداکار جلال آل نے سندھ کے سیلاب متاثر بچوں سے ترکیہ زندہ باد کے نعرے لگوادیے۔

جلال آل ایک روز قبل سیلاب متاثرین کی مدد کے لیے ہلال احمر ترکیہ کے تعاون سے کراچی پہنچے تھے اور گزشتہ روز انہوں نے کراچی میں بارش کے دوران سفر کرنے کی ویڈیو بھی شیئر کی تھی۔

کراچی کے بعد وہ سیلاب متاثرین کے لیے کی جانے والی امدادی کارروائیاں دیکھنے کے لیے صوبے کے دیگر اضلاع میں بھی گئے اور انہوں نے انسٹاگرام پر وہاں کی ویڈیوز اور تصاویر بھی شیئر کیں۔

جلال آل کی جانب سے شیئر کی گئی تصاویر میں انہیں امدادی سامان اٹھاکر متاثرین کے کیمپ تک لے جاتے ہوئے دیکھا جا سکتا ہے۔

ترک اداکار نے امدادی کارروائیوں کے دوران فلاحی ادارے کا یونیفام پہن رکھا تھا جب کہ وہ متاثرین میں گھل مل گئے۔

ارطغرل غازی اداکار نے سیلاب متاثرہ خواتین اور بچوں کے ساتھ بھی گفتگو کی جب کہ انہوں نے متاثرہ بچوں سے پاکستان اور ترکیہ زندہ باد کے نعرے بھی لگوائے، جس کی ویڈیو انہوں نے انسٹاگرام پر شیئر کی۔

انہوں نے سیلاب متاثرہ بچوں کو ارطغرل غازی ڈرامے میں ارطغرل کی جانب سے پہنی گئی ٹوپی کا تحفہ بھی دیا اور انہیں وہ ٹوپی پہنائی بھی اور بعد ازاں انہوں نے بچوں کی ٹوپی کے ہمراہ تصویر بھی شیئر کی۔

ترک اداکار کی جانب سے سیلاب متاثرین کی مدد کے لیے پاکستان آنے اور ان کی جانب سے متاثرین کے ساتھ گھل مل جانے پر ان کی تعریفیں بھی کی جا رہی ہیں۔

جلال آل ترک حلال احمد کے تعاون سے پاکستان آئے ہیں اور گزشتہ روز انہوں نے اپنی پوسٹ کے ذریعے پاکستانی مداحوں کو سیلاب متاثرین کی مدد کی اپیل بھی کی تھی۔

جلال آل حالیہ دورے سے قبل بھی متعدد پاکستان آ چکے ہیں اور انہیں 2020 میں پاکستان ٹیلی وژن (پی ٹی وی) پر اردو میں نشر کیے جانے والے ڈرامے ’ارطغرل غازی‘ میں کمانڈر عبدالرحمٰن الپ کا کردار ادا کیا تھا جو مرکزی کردار ارطغرل کے خاص سپاہی ہوتے ہیں۔