اداکارہ اقرا عزیز نے فیروز خان پر سابق اہلیہ علیزے سلطان پر تشدد کی خبریں سامنے آنے کے بعد خود کو اداکار کے ساتھ منصوبے سے الگ کرنے کا اعلان کردیا۔

فیروز خان کی سابق اہلیہ علیزے سلطان پر تشدد کی تصاویر دو دن قبل وائرل ہوئی تھیں، جنہیں انہوں نے عدالت میں جمع کروایا تھا۔

علیزے سلطان نے بچوں کی حوالگی سے متعلق کیس میں فیروز خان کی جانب سے تشدد کا نشانہ بنائے جانے کے شواہد پیش کیے تھے، جس کے بعد ان کی تصاویر سوشل میڈیا پر بھی وائرل ہوگئی تھیں۔

علیزے سلطان کی تشدد کی تصاویر سوشل میڈیا پر وائرل ہونے کے بعد متعدد شوبز شخصیات نے فیروز خان کو آڑے ہاتھوں لیتے ہوئے ان پر پابندی کا مطالبہ کیا تھا۔

یہ بھی پڑھیں: میاں، بیوی میں جھگڑے عام بات ہیں، تشدد نارمل نہیں، یاسر حسین

شوبز شخصیات سمیت عام لوگوں کی جانب سے بھی الزامات کی بھرمار کے بعد فیروز خان نے بھی وضاحت دیتے ہوئے سابق بیوی پر تشدد کے الزامات کو من گھڑت قرار دیا تھا اور کہا تھا کہ وہ الزام تراشی کرنے والے افراد کے خلاف قانونی کارروائی کریں گے۔

اقرا عزیز سے قبل ان کے شوہر یاسر حسین نے بھی علیزے سلطان کی حمایت کی تھی اور اب اداکارہ نے خود کو فیروز خان کے ساتھ منصوبے سے الگ ہونے کا اعلان کردیا۔

اقرا عزیز نے انسٹاگرام پوسٹ میں لکھا کہ ان کے لیے یہ فیصلہ بہت ہی مشکل تھا مگر یہ بھی ضروری تھا کہ وہ مظلوم کی حمایت میں یہی فیصلہ کرتیں، اس لیے وہ فیروز خان کے ساتھ منصوبے سے خود کو الگ کرنے کا اعلان کر رہی ہیں۔

اقرا عزیز نے لکھا کہ ناانصافیوں اور ظلم پر خاموش رہنا بھی ایک طرح سے ظالم کا ساتھ دینے کے برابر ہوتا ہے۔

اداکارہ نے لکھا کہ گھریلو تشدد کے حالیہ واقعے کے بعد انہوں نے مشکل مگر ضروری فیصلہ کیا ہے کہ وہ خود کو فیروز خان کے ساتھ منصوبے سے الگ کریں گی۔

انہوں نے واضح کیا کہ انہوں نے علیزے سلطان کے ساتھ اظہار ہمدردی کے تحت ہی مذکورہ فیصلہ کیا ہے اور وہ انہیں انصاف فراہم کروانے کے لیے ان کے ساتھ ہیں۔

انہوں نے علیزے سلطان کی حوصلہ افزائی کرتے ہوئے انہیں مضبوط رہنے کی بھی تائید کی۔

اگرچہ اقرا عزیز نے خود کو فیروز خان کے ساتھ منصوبے سے الگ کرنے کا اعلان کیا، تاہم انہوں نے اس ضمن میں کوئی تفصیلات نہیں بتائیں کہ وہ انہوں نے خود کو اداکار کے ساتھ کون سے منصوبے سے الگ کیا ہے؟

اقرا عزیز ماضی میں فیروز خان کے ساتھ ’خدا اور محبت‘ جیسے مقبول ڈرامے سمیت مختلف منصوبوں میں کام کر چکی ہیں اور حال ہی میں وہ ان کے ساتھ ’سانول یار پیا‘ میں بھی نظر آئی تھیں۔

ممکنہ طور پر اقرا عزیز نے خود کو فیروز خان کے ساتھ کسی مستقبل کے منصوبے سے الگ کیا ہوگا، تاہم اس حوالے سے کچھ بھی کہنا قبل از وقت ہے۔