گزشتہ چند دن سے انٹرنیٹ پر اپنے بے ترتیب ڈانس اسٹیپس سے لوگوں کو دیوانہ بنانے والی ٹک ٹاکرعائشہ عرف مانو کے ندا یاسر کے مارننگ شو میں گروپ ڈانس کی بھی ویڈیوز وائرل ہوگئیں۔

عائشہ نے گزشتہ ماہ اکتوبر کے آخر میں ایک شادی کی تقریب میں لتا منگیشکر کے پرانے گانے ’میرا دل یہ پکارے آجا‘ کے ریمکس پر منفرد انداز میں ڈانس کرکے جہاں شادی کی تقریب میں شامل مہمانوں کو محظوظ کیا، وہیں ان کی ویڈیو بھی دیکھتے ہی دیکھتے وائرل ہوگئی۔

ان کی مذکورہ ویڈیو کو نہ صرف پاکستان بلکہ بیرون ممالک میں بھی سراہا گیا اور کئی ٹک ٹاکرز ان کی نقل اتارتی دکھائی دیں جب کہ ’میرا دل یہ پکارے آجا‘ پر لڑکے بھی ڈانس کرتے دکھائی دیے۔

ڈانس کی ویڈیو وائرل ہونے کے بعد سوشل میڈیا پر جہاں عائشہ کے شہرت میں اضافہ ہوا، وہیں انسٹاگرام اور ٹک ٹاکر پر ان کے تین لاکھ فالوورز بھی بڑھے۔

ویڈیو وائرل ہونے کے بعد حال ہی میں وہ ندا یاسر کے مارننگ شو میں شریک ہوئیں، جہاں انہوں نے ایک بار پھر مختلف گانوں پر ڈانس کرکے لوگوں کو محظوظ کیا۔

پروگرام میں عائشہ نے بتایا کہ انہوں نے اپنی بچپن کی سہیلی کی شادی پر ’میرے دل یہ پکارے آجا‘ پر ڈانس کیا تھا۔

انہوں نے دعویٰ کیا کہ انہوں نے پہلے کوئی تیاری نہیں کر رکھی تھی، اچانک شادی کی تقریب میں مذکورہ گانا چلاکر ان سے ڈانس کی فرمائش کی گئی۔

عائشہ کے مطابق چوں کہ دلہن ان کی سہیلی تھیں، اس لیے انہیں ڈانس کرنا پڑا، لیکن انہیں یہ اندازہ نہیں تھا کہ وہ ان کی ویڈیو وائرل ہوجائے گی۔

انہوں نے بتایا کہ شادی کی تقریب ختم ہونے کے چند دن بعد انہوں نے انسٹاگرام پر اپنی ویڈیو کو وائرل ہوتے دیکھا اور پھر ان کے والدین سمیت دیگر اہل خانہ نے بھی دیکھی۔

ٹک ٹاکر کے مطابق والدین نے انہیں کچھ نہیں کہا بلکہ انہوں نے انہیں سپورٹ کیا، تاہم خاندان کے کچھ لوگ ان پر ناراض ہوئے لیکن انہوں نے ناراض ہونے والوں کو کوئی جواب نہیں دیا۔

ایک سوال کے جواب میں انہوں نے خواہش ظاہر کی کہ انہیں اداکاری کا بہت شوق ہے، اب وائرل ہونے کے بعد وہ چاہتی ہیں کہ انہیں اداکاری کا چانس دیا جائے۔

بعد ازاں عائشہ نے پروگرام میں دوسرے لوگوں کے ساتھ مل کر مختلف گانوں پر ’میرا دل یہ پکارے آجا‘ انداز میں ڈانس بھی کیا اور ان کی ڈانس کی ویڈیوز وائرل ہوگئیں۔

لوگوں نے ندا یاسر کے شو میں عائشہ کی ڈانس ویڈیوز کی بھی تعریفیں کیں اور لکھا کہ اب انہیں جلد ہی وہ اداکاری بھی کرتی دکھائی دیں گی۔