بیوی کا پیسے دینے سے انکار، منشیات کےعادی باپ نے بیٹے کو زمین پر پٹخ کر مار ڈالا

اپ ڈیٹ 30 نومبر 2022
معصوم بیٹے کو قتل کرنے والا شخص گرفتار—فائل فوٹو: رائٹرز
معصوم بیٹے کو قتل کرنے والا شخص گرفتار—فائل فوٹو: رائٹرز

کراچی کے جناح ہسپتال میں اپنی زخمی اہلیہ کی جانب سے پیسے دینے سے انکار پر نشے کے عادی شخص نے اپنے ہی معصوم بیٹے کو زمین پر پٹخ کر قتل کردیا جس کے بعد پولیس نے ملزم کو گرفتار کرلیا۔

ڈان اخبار کی رپورٹ کے مطابق ایس ایس پی جنوب سید اسد رضا نے ڈان کو بتایا کہ یہ واقعہ پیر کی رات اس وقت پیش آیا جب آصف حسین نامی شخص سڑک حادثے میں زخمی ہونے والی 40 سالہ اہلیہ کنیز بی بی کے پاس گیا جو اپنے دو بچوں عاطف اور سلمیٰ کے ہمراہ ہسپتال میں زیر علاج تھیں۔

ایس ایس پی نے کہا کہ کنیز بی بی ہسپتال کے اسٹریچر پر تھیں تو کسی شخص نے بطور صدقہ خیرات انہیں ایک ہزار روپے دیے۔

ایس ایس پی نے مزید بتایا کہ ملزم نشے کا عادی تھا جس نے اپنی اہلیہ سے وہ ایک ہزار مانگے لیکن اہلیہ نے پیسے دینے سے انکار کیا جس پر ملزم نے جھگڑا شروع کردیا اور اپنے ایک سالہ بیٹے کو اسٹریچر سے اٹھا کر زمین پر پھینکا جس کی وجہ سے بچے کی موت واقع ہو گئی۔

پولیس نے اہلیہ کی شکایت پر اس کے خلاف مقدمہ درج کرکے ملزم کو گرفتار کرلیا۔

متاثرہ خاندان کا تعلق رحیم یار خان سے ہے جو کراچی کے علاقے سہراب گوٹھ میں رہائش پذیر ہے۔

تبصرے (0) بند ہیں