• KHI: Fajr 4:13am Sunrise 5:42am
  • LHR: Fajr 3:18am Sunrise 4:57am
  • ISB: Fajr 3:13am Sunrise 4:57am
  • KHI: Fajr 4:13am Sunrise 5:42am
  • LHR: Fajr 3:18am Sunrise 4:57am
  • ISB: Fajr 3:13am Sunrise 4:57am

بلوچستان: ایرانی سرحد سے دہشت گردوں کی فائرنگ، 4 سپاہی شہید

شائع April 1, 2023
دہشت گردوں نے ضلع کیچ میں پاک ایران سرحد پر گشت پر مامور سپاہیوں پر حملہ کیا— فائل فوٹو: اے ایف پی
دہشت گردوں نے ضلع کیچ میں پاک ایران سرحد پر گشت پر مامور سپاہیوں پر حملہ کیا— فائل فوٹو: اے ایف پی

بلوچستان کے ضلع کیچ میں ایرانی سرحد سے دہشت گردوں کی فائرنگ کے نتیجے میں پاک فوج کے 4 سپاہی شہید ہوگئے۔

پاک فوج کے شعبہ تعلقات انٹر سروسز پبلک ریلیشنز(آئی ایس پی آر) سے جاری بیان کے مطابق یکم اپریل 2023 کو ایرانی سرحد پر موجود دہشت گردوں کے ایک گروپ نے ضلع کیچ کے جلگئی سیکٹر میں پاک ایران سرحد پر معمول کے گشت پر مامور پاکستانی سیکیورٹی فورسز پر حملہ کیا۔

بیان میں بتایا گیا کہ حملے میں نائیک شیر احمد، لانس نائیک محمد اصغر، سپاہی محمد عرفان اور سپاہی عبدالرشید سمیت 4 فوجی شدید زخمی ہوئے اور زخموں کی تاب نہ لاتے ہوئے جام شہادت نوش کیا۔

انہوں نے کہا کہ ایرانی سرحد پر موجود ان دہشت گردوں کے خلاف موثر کارروائی اور مستقبل میں ایسے واقعات کی روک تھام کے لیے ایرانی فریق سے ضروری رابطہ کیا جا رہا ہے۔

یہ پہلا موقع نہیں کہ ایران کی سرحد سے دہشت گردوں نے پاکستان کی حدود میں کارروائی کی ہو بلکہ بلوچستان میں سیکیورٹی فورسز پر دہشت گردی کے حملے مسلسل ہوتے رہے ہیں۔

اسی طرح کا ایک واقعہ رواں سال جنوری میں پیش آیا تھا جب بلوچستان کے ضلع پنجگور میں ایرانی سرحد سے دہشت گردوں کی فائرنگ کے نتیجے میں پاک فوج کے 4 سپاہی شہید ہوگئے تھے۔

آئی ایس پی آر نے کہا تھا کہ سرحد پر گشت کرنے والے فوجی دستے پر حملہ کرنے کے لیے دہشت گردوں نے ایرانی سرزمین استعمال کی۔

ترجمان دفتر خارجہ ممتاز زہرہ بلوچ نے ایرانی سرزمین سے دہشت گرد حملے کی شدید مذمت کرتے ہوئے ایران سے مطالبہ کیا تھا کہ وہ ذمہ دار عناصر کے خلاف کارروائی کرے گا۔

ممتاز زہرہ بلوچ نے کہا تھا کہ دہشت گردوں نے ایران کی سرزمین استعمال کی اور ہم امید کرتے ہیں کہ ایران ذمہ دار عناصر کے خلاف کارروائی کرے گا۔

اس سے قبل گزشتہ برس 25 دسمبر کو بلوچستان میں ضلع ژوب کے علاقے سمبازا میں سیکیورٹی فورسز کے آپریشن کے دوران عسکریت پسندوں کے ساتھ فائرنگ کے تبادلے میں ایک دہشت گرد ہلاک جبکہ ایک سپاہی شہید ہوگیا تھا۔

26 نومبر کو سیکیورٹی فورسز نے بلوچستان کے علاقے کوہلو میں خفیہ اطلاع کی بنیاد پر کارروائی کرکے 9 دہشت گردوں کو ہلاک اور دیگر 3 کو زخمی حالت میں گرفتار کرلیا تھا۔

کارٹون

کارٹون : 15 جون 2024
کارٹون : 14 جون 2024