اسرائیلی فضائیہ کی جانب سے شدید بمباری کے درمیان پورے غزہ میں انٹرنیٹ اور موبائل سروسز معطل ہونے کے بعد سماجی پلیٹ فارم ’ایکس‘ کے مالک ایلون مسک نے غزہ میں اسٹارلنک کے ذریعے انٹرنیٹ فراہمی کا اعلان کیا ہے۔

غزہ میں اسٹارلنک کے ذریعے انٹرنیٹ فراہمی کے اعلان کے بعد اسرائیل نے ایلون مسک کو خبردار کرتے ہوئے کہا ہے کہ وہ اس فراہمی کو روکنے کے لیے ہر ممکن کوشش کریں گے۔

یاد رہے کہ 27 اکتوبر کو اسرائیل کی جانب سے ایک بار پھر شدید بمباری کے بعد اطلاعات سامنے آئی تھیں کہ غزہ کا بیرونی دنیا سے رابطہ منقطع ہوگیا ہے، فون لائنز، انٹرنیٹ اور موبائل نیٹ ورک کام نہیں کر رہے، غزہ میں پہلے ہی مواصلات، توانائی، خوراک، پانی، ادویات کی شدید کمی تھی۔

اسی دوران ’الجزیرہ‘ کے صحافی نے خان یونس سے سیٹلائٹ کے ذریعے رپورٹنگ جاری رکھی، انہوں نے بتایا کہ غزہ کے شہری تنہا ہیں، شدید بمباری ہورہی ہے، ہر طرف بلیک آؤٹ ہوچکا ہے۔

غزہ میں انٹرنیٹ سروس نہ ہونے کے باعث وہاں موجود صحافیوں کو رپورٹنگ کرنے میں شدید مشکلات کا سامنا رہا تھا، اس کے علاوہ دیگر ممالک کے لوگ بھی غزہ میں موجود اپنے پیاروں سے رابطہ نہیں کر پارہے تھے جن میں اسکاٹ لینڈ کے وزیراعظم حمزہ یوسف بھی شامل ہیں جن کا خاندان غزہ میں موجود ہے۔

اس تمام صورتحال کے بعد سوشل میڈیا پر صارفین ہیش ٹیگ ’اسٹار لنک فار غزہ‘ کا استعمال کرتے ہوئے ایلون مسک سے مطالبہ کر رہے تھے کہ غزہ میں اسٹارلنک کے ذریعے انٹرنیٹ فراہم کیا جائے جس طرح انہوں نے روس اور یوکرین جنگ میں یوکرینی لوگوں کو فراہم کیا تھا۔

صارفین کے مطالبے کے بعد ایلون مسک نے اعلان کیا کہ وہ سیٹلائٹ کے ذریعے انٹرنیٹ فراہم کرنے والی اپنی کمپنی اسٹارلنک کے ذریعے غزہ میں انٹرنیٹ فراہم کریں گے۔

ایلون مسک کا یہ بیان ایک امریکی خاتون رکن کانگریس الیگزینڈرا کارٹیز کی ایکس پر کی گئی پوسٹ پر آیا تھا۔

امریکی خاتون رکن کانگریس الیگزینڈرا کارٹیز کا کہنا تھا کہ 22 لاکھ کی آبادی کا مواصلاتی رابطہ منقطع کرنا ناقابل قبول ہے، صحافی، طبی عملہ، انسانی حقوق کے کارکن اور معصوم لوگ سب متاثر ہوں گے۔

ان کا مزید کہنا تھا کہ سمجھ نہیں آتا کہ اس قسم کے عمل کا کس طرح دفاع کیا جاسکتا ہے، امریکا نے ہمیشہ اس کی مذمت کی ہے۔

امریکی خاتون رکن کانگریس کی ٹوئٹ کو ری پوسٹ کرتے ہوئے ایلون مسک کہا کہ ’اسٹار لنک عالمی سطح پر منظور امدادی تنظیموں کو انٹرنیٹ کی فراہمی میں مدد کرے گی‘۔

سی این این کی رپورٹ کے مطابق سماجی پلیٹ فارم ایکس کے مالک کے اعلان کے بعد اسرائیل نے ایلون مسک پر برہمی کا اظہار کرتے ہوئے خبردار کیا کہ وہ اسٹارلنک کے ذریعے غزہ میں انٹرنیٹ فراہمی کو روکنے کے لیے ہر ممکن کوشش کریں گے۔

اسرائیل کے وزیر مواصلات شلومو کرہی نے الزام لگایا کہ حماس ’اسے دہشت گردانہ سرگرمیوں کے لیے استعمال کرے گی۔‘

دوسری جانب امریکی میڈیا ایکٹیوسٹ جیکسن ہنکل نامی صارف نے دعویٰ کیا کہ اسرائیل نے ایلون مسک کے اسٹارلنک سے تمام تعلقات ختم کردیے ہیں۔

اسٹار لنک کیا ہے؟

ایلون مسک کا اسٹار لنک منصوبہ سیٹلائٹس کے ایک وسیع نیٹ ورک کے ذریعے انٹرنیٹ سروس مہیا کرتا ہے، اس کا مقصد ان افراد کو تیز ترین انٹرنیٹ کی سروس مہیا کرنا ہے جو زمین کے دور دراز یا دیہی علاقوں میں رہتے ہیں جنہیں تیز انٹرنیٹ تک رسائی حاصل نہیں ہوتی۔