شوکت ترین کا سیاست اور پی ٹی آئی چھوڑنے کا اعلان

اپ ڈیٹ 08 دسمبر 2023
شوکت ترین — فائل فوٹو: اے ایف پی
شوکت ترین — فائل فوٹو: اے ایف پی

سابق وزیر خزانہ شوکت ترین نے بھی سیاست اور پاکستان تحریک انصاف (پی ٹی آئی) چھوڑنے کا اعلان کردیا۔

اسلام آباد میں میڈیا کے نمائندوں سے گفتگو کرتے ہوئے شوکت ترین نے سیاست کے ساتھ ساتھ پاکستان تحریک انصاف چھوڑنے کا بھی اعلان کیا۔

شوکت ترین نے کہا کہ وہ سینیٹ کی نشست سے بھی استعفیٰ دے رہے ہیں۔

ان کا کہنا تھا کہ اہل خانہ اور دوستوں سے مشاورت کے بعد سیاست سے کنارہ کشی اختیار کر رہا ہوں۔

انہوں نے کہا کہ گزشتہ دو سال مالی اور صحت کے لحاظ سے بہت مشکل رہے، دو تین مرتبہ کووڈ ہوا تو اسی لیے اہلخانہ اور دوستوں کے مشورے سے پی ٹی آئی اور سینیٹ کی رکنیت دونوں چھوڑ رہا ہوں۔

سابق وزیر خزانہ نے کہا کہ میں نے پوری کوشش کی کہ ملک کے لیے جو بھی کر سکتا ہوں وہ کروں لیکن اس وقت صحت اجازت نہیں دے رہی۔

واضح رہے کہ ماضی میں پیپلز پارٹی کا حصہ رہنے والے شوکت ترین نے پاکستان تحریک انصاف کے 2018 میں برسراقتدار آنے کے بعد اس میں شمولیت کا اعلان کیا تھا۔

ماضی میں بھی وزیر خزانہ کی ذمے داریاں نبھانے والے شوکت ترین کو ایک مرتبہ پھر یہ منصب سونپا گیا اور انہیں پاکستان تحریک انصاف کی حکومت میں وزیر خزانہ مقرر کیا گیا تھا۔

تاہم چھ ماہ بعد ہی انہیں وزیر خزانہ کے عہدے سے ہٹا کر مشیر خزانہ بنادیا گیا تھا، آئین کے آرٹیکل 93 کے تحت وہ صرف 6 ماہ تک وفاقی وزیر رہ سکتے تھے کیونکہ کابینہ کا حصہ بننے کے لیے کسی بھی شخص کے لیے سینیٹر یا قومی اسمبلی کا رکن ہونا ضروری ہے۔

تبصرے (0) بند ہیں