وفاقی وزیر توانائی ڈاکٹر مصدق ملک نے کہا ہے کہ عوام کی سہولت موجودہ حکومت کی اولین ترجیح ہے، جبکہ گردشی قرضے کے پائیدار حل کے لیے تجاویز پر کام شروع کر دیا ہے۔

سرکاری خبر رساں ایجنسی ’اے پی پی‘ کے مطابق مصدق ملک نے وفاقی وزیر توانائی کے عہدے کا چارج سنبھال لیا۔

وزارت آمد پر سیکریٹری پیٹرولیم مومن آغا اور دیگر افسران کی جانب سے وفاقی وزیر توانائی کو خوش آمدید کہا گیا۔

اس موقع پر گفتگو کرتے ہوئے مصدق ملک نے کہا کہ عوام کی سہولت موجودہ حکومت کی اولین ترجیح ہے، سحر و افطار کے اوقات میں بجلی و گیس کی فراہمی یقینی بنائی جائے گی۔

انہوں نے کہا کہ گردشی قرضے کے پائیدار حل کے لیے تجاویز پر کام شروع کر دیا ہے، گیس و معدنیات کے شعبے میں مقامی و بیرونی سرمایہ کاری کی سہولت کاری کی جائے گی۔

ان کا کہنا تھا کہ مشکل حالات کے باوجود حکومت کی پالیسیوں کا محور صرف عوام ہیں۔