کراچی کے علاقے سرجانی ٹاؤن میں شادی کی تقریب کے دوران ہوائی فائرنگ سے ایک 6 سالہ بچہ جاں بحق جبکہ ایک اور 6 سالہ بچے سمیت 2 افراد زخمی ہو گئے۔

سینئر سپرنٹنڈنٹ آف پولیس (ایس ایس پی) کراچی غربی طارق الٰہی مستوئی نے بتایا کہ تیسر ٹاؤن سیکٹر 35 سی میں شادی کی تقریب کے دوران کچھ افراد نے فائرنگ کی، جس کے نتیجے میں ایک بچہ جاں بحق ہوگیا جبکہ ایک دوسرا بچہ اور ایک آدمی زخمی ہوگیا۔

جاں بحق ہونے والوں کی شناخت 6 سالہ بنجو سے ہوئی، جبکہ زخمی ہونے والوں میں 6 سالہ ایلان شہزاد اور 30 ​​سالہ رابن بابر شامل ہیں، انہیں عباسی شہید ہسپتال منتقل کر دیا گیا۔

ایس ایس پی نے بتایا کہ اطلاع ملنے پر پولیس موقع پر پہنچی اور فائرنگ میں استعمال ہونے والا 9 ایم ایم پستول برآمد کرلیا، جبکہ ملزمان کی گرفتاری کے لیے کارروائی کی جارہی ہے۔

سرجانی تھانے کے اسٹیشن ہاؤس افسر (ایس ایچ او) غلام حسین پیرزادہ نے ڈان نیوز ڈاٹ ٹی وی کو بتایا کہ شادی کی تقریب کرسچن محلہ میں ہوئی، مشتبہ شخص مقتول کا رشتہ دار ہے، جو فرار ہونے میں کامیاب رہا لیکن اپنی پستول چھوڑ گیا۔

غیرت کے نام پر خاتون، مرد قتل

ایک علیحدہ واقعے میں ایک خاتون اور ایک شخص کو منگھوپیر کے علاقے میں بظاہر ’غیرت‘ کے نام پر قتل کر دیا گیا۔

پولیس نے بتایا کہ 29 سالہ محمد اختر اور 45 سالہ گلسانہ حسین کو ونگی گوٹھ کے قریب گولی مار کر قتل کیا گیا۔

ایس ایس پی مستوئی کا کہنا تھا کہ’ابتدائی تفتیش کے دوران معلوم ہوا کہ نامعلوم ملزمان نے انہیں نامعلوم ذاتی دشمنی پر قتل کیا۔

ایس ایچ او منگھوپیر عمران احمد خان نے بتایا کہ اس شخص کا تعلق سرگودھا جبکہ خاتون کا تعلق نوشہروفیروز سے تھا۔

انہوں نے کہا کہ مقتولین پیدل کہیں جا رہے تھے کہ نامعلوم مسلح افراد نے ان پر اندھا دھند فائرنگ کر دی، انہوں نے کہا کہ بظاہر یہ ’غیرت کے نام پر قتل‘ کا نتیجہ معلوم ہوتا ہے۔

ان کا کہنا تھا کہ تفتیش کاروں نے جائے وقوعہ سے لگ بھگ 15 گولیوں کے خول اکٹھے کیے ہیں۔