پی ایس ایل 10: کوئٹہ گلیڈی ایٹرز نے ملتان سلطانز کو 10 وکٹوں سے شکست دے دی
پاکستان سپر لیگ (پی ایس ایل) کے 18ویں میچ میں کوئٹہ گلیڈی ایٹرز نے ملتان سلطانز نے کو 10 وکٹوں سے شکست دے دی۔
لاہور کے قذافی اسٹیڈیم میں کھیلے گئے میچ میں کوئٹہ گلیڈی ایٹرز کی نپی تلی باؤلنگ کی بدولت ملتان سلطانز کی ٹیم 20 اوورز بھی پورے نہ کھیل سکی اور پوری ٹیم صرف 89 رنز پر ڈھیر ہوگئی۔
کوئٹہ نے ہدف کے تعاقب میں جارحانہ انداز اپنایا اور 90 رنز کا ہدف ساتویں اوور میں ہی حاصل کر لیا۔
کپتان سعود شکیل نے 20 گیندوں پر 4 چھکوں اور 3 چوکوں کی مدد سے 42 رنز بنائے جبکہ فن ایلن نے 21 گیندوں پر 45 رنز کی اننگز میں 5 چھکے جڑ دیے۔
ملتان سلطانز کی جانب سے کوئی بھی باؤلر وکٹ حاصل نہیں کرسکا۔
اس سے قبل، کوئٹہ گلیڈی ایٹرز کے کپتان سعود شکیل نے ٹاس جیت کر پہلے فیلڈنگ کرنے کا فیصلہ کیا تھا۔
ملتان سلطانز کی جانب سے اننگز کا آغاز کرنے والے یاسر خان صرف 5 رنز کے مہمان ثابت ہوئے جس کے بعد آنے والے بلے باز عثمان خان اپنی تیسری ہی گیند پر کھاتہ کھولے بغیر پویلین واپس لوٹ گئے۔
پچھلے میچ میں نصف سینچری بنانے والے کامران غلام بھی 3 رنز بناکر آؤٹ ہوگئے جب کہ اپنا پہلا پی ایس ایل میچ کھیلنے والے آئرلینڈ کے کرٹس کیمفر 4 رنز ہی بناسکے، ابتدائی چاروں وکٹیں خرم شہزاد نے حاصل کی۔
افتخار احمد 6، مائیکل بریسویل صفر، ڈیوڈ ویلے 7، اسامہ میر 11، محمد حسنین 2 اور عبید شاہ 1 رن بنا کر آؤٹ ہوئے جب کہ کپتان محمد رضوان 44 رنز پر ناٹ آؤٹ رہے۔
کوئٹہ گلیڈی ایٹرز کی جانب سے خرم شہزاد نے 4، فہیم اشرف اور محمد وسیم جونیئر نے 2،2 وکٹیں حاصل کیں۔
کوئٹہ گلیڈی ایٹرز نے پشاور زلمی کو شکست دینے والی پلینگ الیون کو ہی میدان میں اتارا ہے تاہم ملتان سلطانز نے ٹیم میں 3 تبدیلیاں کی ہیں۔
ملتان سلطانز نے اسامہ میر، ڈیوڈ ویلے اور کرٹس کیمفر کو شائے ہوپ، جوش لٹل اور عاقف جاوید کی جگہ ٹیم میں شامل کیا ہے۔
لائیو ٹی وی