بھارتی فوج کا غیر قانونی حراست میں رکھے گئے پاکستانیوں کو جعلی انکاؤنٹر میں استعمال کرنے کا مذموم منصوبہ
بھارتی فوج اور انٹیلی جنس نے غیر قانونی اور جبراً حراست میں رکھے گئے معصوم پاکستانیوں کو جعلی انکاؤنٹر میں استعمال کرنے کا مذموم منصوبہ بنالیا۔
سیکیورٹی ذرائع کے مطابق بھارتی انٹیلی جنس اور بھارتی فوج نے درجنوں پاکستانی جو جبراً اور غیر قانونی طور پر بھارتی ایجنسیوں کی حراست میں ہیں، انہیں مقبوضہ کشمیر کے مختلف علاقوں میں باہر نکال کر جعلی انکاؤنٹرز میں مارنے کا شرمناک منصوبہ بنالیا ہے۔
مختلف جیلوں اور ایجنسیوں میں رکھے جانے والے افراد کو مارنے کے بعد پاکستان کی طرف سے سرحد پار دہشت گرد قرار دیا جائے گا۔
سیکیورٹی ذرائع نے بتایا کہ منصوبے کے مطابق جعلی انکاؤنٹر کے فوری بعد بھارتی میڈیا کو پہلے ہی سے ان افراد کی لاشیں اور پلانٹڈ ہتھیار وغیرہ کی ویڈیوز اور تصاویر شیئر کردی جائیں گی، بھارتی میڈیا روایتی طریقے سے ان افراد کو پاکستان سے آنے والے دہشت گرد ظاہر کرے گا۔
سیکیورٹی ذرائع کے مطابق اس مذموم منصوبے کا مقصد پہلگام فالس فلیگ ناکام ہونے کے بعد پاکستان کے خلاف جارحیت کرنے کی ایک اور من گھڑت کہانی بنانا ہے۔
مصدقہ اطلاعات کے مطابق غیر قانونی طور پر حراست میں موجود کچھ افراد کو زندہ دہشت گرد ظاہر کر کے میڈیا کے سامنے پاکستان مخالف بیانات اور اعتراف جرم کے بیان بھی دلوائے جا سکتے ہیں۔
29 اور 30 اپریل کو ڈی جی آئی ایس پی آر اپنی پریس کانفرنسز میں پہلے ہی 723 پاکستانی افراد جو مختلف بھارتی جیلوں میں غیر قانونی طور پر بند ہیں، کی تفصیلات بتا چکے ہیں۔
اس کے علاوہ 56 ایسے پاکستانی افراد بھی ہیں جن کو بھارتی خفیہ ایجنسیوں نے غیر قانونی اور جبراً اپنی حراست میں رکھا ہوا ہے، ان 56 افراد کی تفصیلات بھی ڈی جی آئی ایس پی آر اپنی پریس کانفرنسز میں بتا چکے ہیں۔
بھارتی حراست میں موجود ان افراد کو کسی بھی وقت پاکستان کے خلاف ہرزہ سرائی اور جارحیت کرنے کے لیے استعمال کیا جا سکتا ہے۔
اس سے پہلے بھی 24 اپریل کو آزاد جموں و کشمیر کے دو شہریوں محمد فاروق اور محمد دین کو غلطی سے سرحد پار کر جانے پر بھارتی فوج نے ظالمانہ طریقے سے جعلی انکاؤنٹر میں مار دیا تھا۔
واضح رہے کہ بھارتی فوج، مقبوضہ کشمیر میں جعلی انکاؤنٹر اسپیشلسٹ کے طور پر بدنام زمانہ ہے، جبکہ پہلگام فالس فلیگ کی ناکامی کے بعد بھارت مکمل طور بھوکھلا چکا ہے۔
لائیو ٹی وی