قومی اتحاد کو عمران خان کی رہائی سے مشروط کرنا حب الوطنی کو مشروط کرنے کے مترادف ہے، خواجہ آصف
وزیر دفاع خواجہ آصف نے کہا ہے کہ قومی اتحاد اور اظہار یکجہتی کو عمران خان کی شرکت یا رہائی سے مشروط کرنا پی ٹی آئی کی کوتاہ اندیشی ہے اور یہ حب الوطنی کو مشروط کرنے کے مترادف ہے۔
سماجی رابطے کے پلیٹ فارم ’ایکس‘ پر کی گئی پوسٹ میں خواجہ آصف کا کہنا تھا کہ پلوامہ کے واقعہ کے وقت مسلم لیگ (ن) کی قیادت کا بیشتر حصہ بانی پی ٹی آئی کی فرمائش پر قید تھا۔
انہوں نے کہا کہ جیلوں سے باہر قیادت نے عمران خان کی بلائی بریفنگ میں شرکت کی لیکن بانی پی ٹی آئی نے اس بریفنگ میں ان سے ساتھ بیٹھنے سے انکار کیا۔
ان کا کہنا تھا کہ لیگی قیادت نے قومی اتحاد میں رخنہ نہیں ڈالا، وطن اور اسکی سلامتی شخصیات اور لیڈرشپ سے کہیں زیادہ اہم ہے۔
خواجہ آصف نے مزید کہا کہ پاکستان کو تا قیامت دوام ہے، انشااللہ، بڑے محترم لیڈر آئے اور دنیا سے رخصت ہوئے، وہ اپنی یاد چھوڑ جاتے ہیں اور قومیں زندہ رہتی ہیں۔
واضح رہے کہ پاک بھارت کشیدگی پر حکومت کی جانب سے سیاسی جماعتوں کے رہنماؤں کو بریفنگ دینے کا فیصلہ کیا گیا، وفاقی وزیر اطلاعات عطاتارڑ اور ڈی جی آئی ایس پی آر لیفٹیننٹ جنرل احمد شریف چوہدری نے ان کیمرا بریفنگ دی۔
تاہم، پاکستان تحریک انصاف (پی ٹی آئی) نے پہلگام حملے کے بعد کی صورتحال پر حکومت کی جانب سے دی جانے والی بریفنگ میں شرکت نہ کرنے کا فیصلہ کیا۔
پی ٹی آئی کی جانب سے سوشل میڈیا ’ایکس‘ پر جاری بیان میں کہا گیا کہ چونکہ یہ محض ایک حکومتی بریفنگ ہے، اس میں کوئی قومی اتفاقِ رائے پیدا کرنے کی سنجیدہ کوشش نظر آتی ہے اور نہ ہی حکومت کی عمران خان جیسے اہم قومی رہنما کو شامل کرنے کی نیت ہے لہذا ہم سمجھتے ہیں کہ اس بریفنگ میں پاکستان تحریک انصاف کی شرکت ضروری نہیں ہے۔
لائیو ٹی وی